नेपाली हास्यव्यङ्ग्य अनलाइन पत्रिका

जेन काइजेन :

अफ द रेकर्ड
नेताज्यू : ल तिमी आइपुग्यौ ? तिमीलाई मैले अस्ति नै सरकार परिवर्तन होला जस्तो छ, आइहाल भनेको हैन त ?
पत्रकार : हो नि हजुर । गर्दागर्दै अलिक ट्याम लाग्यो । तर केहि छैन । सरकार फेरियो मात्र । पँजनी भाकै छैन ।
नेताज्यू : अब यो अन्तर्वार्ता भाइरल हुनपरो । मेरो सानो दुर्घटनामा परेर टाउकोमा चोट छ । अलिक अनुहार पनि चिथरिएको छ । त्यसकारण यसपाला मेरा फोटा मात्र हालेर आवाज मात्र प्रसारण गर ।

(नेताज्यूमाथि सार्वजनिक स्थलमै केहि भरौटे, झोलेहरूले हालसालै निर्घात आक्रमण गरेको हँुदा उहाँ मुख देखाउन लायक नरहनुभएको अवगत गराइन्छ । घटना रात्रीकालको भएकोले आक्रमणकारीहरूको खुटपत्तो पाउन सकिएको छैन ।)
एक भव्य कोठामा हाल सत्तासिन पार्टीका प्रमुख नेताहरूका साथमा हाम्रा नेताज्यूले कुम जोडेर खिचेका फोटाहरू सजाइएका छन् । नेताजी फरार तालिवान लिडर झै अज्ञात स्थलबाट बोलिरहेको भान हुन्छ ।

पत्रकार : ल शुरु गरौं है त हजुर ।
नेताजी : ल ल । मैले भनेका टिपाएका परश्न मात्र सोध्ने । जथाभाबि जान्ने हुने हैन । फेरि निमेक हराउँला नि ।
पत्रकार : हस् हुन्छ ।

अब रेकर्ड शुरु हुन्छ ।

पत्रकार : नमस्कार दर्शकवृन्द । रन्को युट्युब च्यानलको लागि म तपाईंहरूको बुद्धिसिद्धि फेरि एउटा सनसनीपूणर् अन्तर्वार्ता लिएर आएको छु । अबको केहि समय म तपाईंहरू समक्ष जनताका अति प्रिय, प्रजातन्त्रका रक्षक, दर्जनौंपटक गोलि लाग्न र जेल जानबाट बच्नुभएका अत्यन्त कुशल राजनीतिज्ञ मनोहर चन्चलज्यूसँगको अज्ञात स्थलमा रेकर्ड गरिएको वार्ता प्रस्तुत गर्दैछु । उहाँसँग हामी वर्तमान तरल राजनीतिक अवस्था बारेमा छोटो वार्ता गर्नेछौँ ।
जनप्रिय नेता चन्चलज्यूलाई रन्को च्यानलमा स्वागत छ ।

चन्चल : नमस्कार त खाने मान्छे हुँ म तैपनि नमस्कार छ तपैंहरूलाई । म यो मुलुकको हालको अस्थिरता अन्त्य गर्नमा दत्तचित्त भएर लागिरहँदा केहि आतंककारीहरूको निशानामा परेँ । अहिले म अज्ञात स्थलमा शेल्टर लिनपर्ने बाध्यता रहेकोले मेरो आवाजले मात्र पनि तपाईं शुभचिन्तकहरूलाई राहत दिनेछ भन्ने आशा लिएको छु ।
बुद्धिसिद्धि : यो दुर्दशा कसरी हुनगयो नेताज्यू ?
चन्चल : म सधैँ भ्रष्टाचारी, मुलुकमारा र विदेशी दलालहरूको विरोधमा हुन्छु । तिनीहरूको जरा टक्टक्याउन म मेरो प्राण आहुती दिन तयार छु । त्यसै क्रममा एक स्थानमा भैरहेको षडयन्त्रकारीहरूको भेलालाई अवरोध गर्ने क्रममा ममाथि साङ्घातिक हमला हुन गयो ।
बुद्धिसिद्धि : तपाईंले सुगन्ध दोहोरी साँझमा महिलामाथि दुव्र्यवहार गर्नुभएको र सोहि क्रममा तपाईंमाथि आक्रमण भएको भन्ने कुरा केहि अखबार र च्यानलमा आयो । यसमा तपाईं के भन्नुहुन्छ ?
चन्चल : विरोधिहरूले सधैँ सत्यलाई तोडमरोड गर्छन् । त्यहाँकी प्रमुख मतियारलाई समाएर जनतासामु प्रस्तुत गरिदिऊँ भन्ने क्रममा मलाई गलत आरोप लगाइयो । यी मेडिया त सबै बिकाउ त हुन् ।

बुद्धिसिद्धि : अनि त्यस्तो जानलेवा आक्रमण बिरुद्दमा किन पुलिस प्रशासनमा उजुरी गर्नुभएन त ?
चन्चल : तपाईं कस्तो बचकाना कुरा गर्नुहुन्छ ? तत् समयमा त पुलिस प्रशासन सबै आफ्नै गोटि हुन्छ । अब बल्ल हाम्रो सरकारले आफ्नै प्रकारका निष्पक्ष मान्छे ल्याएपछि मात्र छानबिन हुन्छ । म उचित समयको पर्खाइमा छु ।
बुद्धिसिद्धि : अनि हजुरको यो पटक कुन क्षेत्रमा योगदान हुनेछ ?
चन्चलः मैले यो सबै हाम्रा शिर्षस्थ नेताहरूमाथि छाडिदिएको छु । उहाँहरूलाई मेरो क्षमता र दक्षता सबै थाहा छ । पार्टीलाई आर्थिक रुपमा मजबुत बनाउनका लागि आन्तरिक श्रोत व्यवस्थापन गर्नेदेखि सो उद्देश्य परिपुर्तिका लागि कार्यकर्ता तालिम र परिचालन गर्नेसम्म मेरो योगदान अहिले कहलिएका सबै पार्टीमा छ । अब पनि मलाई पाटीले उचित स्थान दिनु नै पर्छ ।

बुद्धिसिद्धि : हजुरलाई पटक पटक पार्टी परिवर्तन गरेको आरोप छ नि त ।
चन्चल : त्यो सबै अज्ञानता हो । जनतालाइ भ्रमित पार्न पाटी परिवर्तनको आरोप लगाइएको हो । तर मेरो मूल धर्म भनेको राजनीति हो । बुझ्नु भो ? माइ मेन रिलिजन इज पोलिटिक्स । म जसरी पनि जनताको सेवा गर्न नछोड्ने मान्छे । त जुन पाटीको सरकार आवोस् न । म जनसेवा गर्न अगाडि बढ्छु । नबुझ्नेले यसलाई पाटी परिवर्तन भन्ला तर म त जनताको सेवाका लागि अघि सरेको हो नि ।
बुद्धिसिद्धि : कति घच्चीको कुरा गर्नुभयो यहाँले ।
चन्चल : तपाईं राम मन्दिुर जानोस्, कृष्ण मन्दिर जानोस्, शिवालय जानोस् । गर्ने त पूजा नै हो । गर्ने त धर्म नै हो । प्रभूको सेवा नै हो । त्यस्तै मैले जहाँबाट गरेपनि सरकारमा सामेल भएर गर्ने जनसेवा हो । यसरी बुझ्नोस् यस कुरालाई ।
बुद्धिसिद्धि : धन्यवाद हजुर । हजुरको अमूल्य समयको लागि रन्को च्यानल लगायत म बुद्धिसिद्धि पनि कृतज्ञ छु ।

अफ द रेकर्ड
चन्चल : कहिले हाल्छौ यो ?
बुद्धिसिद्धि : अब भरे नै हाल्ने हो ।
चन्चल : भाइरल गर । जनजनमा पुग्न परो । नेताका कानमा पुग्न परो । भोलिका अखवारमा फ्रन्टमा हुनपरो ।
बुद्धिसिद्धि : त्यो त भै हाल्छ । तर मिलाउन परो नि हजुरले ।
चन्चल : पहिला गर न ।
बुद्धिसिद्धि : हाप अहिले दिनू । हाप पछि हजूर पदस्थापन भएसि मिलाउला ।
चन्चल : ल ऊ त्याहाँ घर्रामा चेक छ ल्याउ त । अनि परराष्ट्र नीति सम्बन्धी छिटो आर्को इन्टरभिउ बनाऊ ।
बुद्धिसिद्धि : भै हाल्छ त हजुर । अब कताको राजदुत खाने हो ? एकपटक घुम्न चैं जानपर्छ नि फेरि । ल अहिलेलाई लागें हजुर । बैङ्क बन्द होला फेरि ।

०००
झापा