नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

क्यै सम्भ्रान्त जमात इष्ट जन वा, हुक्के तथा बैठके ।
होलान् हर्षविभोर, किन्तु जनता, दिक्दारमा छन् हरे !!
फेर्‍यौँ पात्र सयौँ तथापि किन हो ?, आकाश खस्दैन रे ।
भ्रष्टाचार सखाप पार्न यिनले आजन्म सक्दैन रे ॥१

लाले आउँछ लुट्छ अत्यधिक नै, गोरे त्यही गर्दछ ।
झाले बन्दछ खर्बका पति अहो, तारे बुटा भर्दछ ॥
बन्डातन्त्र फुल्यो फल्यो मुलुकमा नेतृत्व धेरै धनी ।
चेपिन्छन् ‘निमुखा र सज्जन’ कठै ! वर्षौँ दरिद्री बनी !!२

सत्ताको चलखेल चल्दछ सधैँ, कुर्ची पिपासा बढ्यो ।
नौला ‘एलिट’ जन्मिए मुलकमा सत्न्याय पूरै सड्यो ॥
हावादार सयौँ तुनेर सपना, बोक्रे कुरा गर्दछन् ।
धेरै कोश लुटेर खर्बपतिले, आफ्नै भुँडी भर्दछन् ॥ ३

झन् झन् दीन र हीन छन् जन कठै, सम्पन्न छोटे नृप।
भ्रष्टाचार चुली चढेर अहिले, हाँस्छन् ठुला तस्कर ॥
यी हैनन् जन विम्ब लस्करहरू हुन् हन्तकाली शठ ।
भ्रष्टैभ्रष्ट मिलेर चुस्नु चुसियो स्वामी सबै गद्गद ॥

०००
धादिङ