नेपाली हास्यव्यङ्ग्य अनलाइन पत्रिका

बासुदेव तिमल्सिना :

केही दिन पहिले फेसबुकमा मलाई कुनै बसन्ती नामकी केटीले फ्रेण्ड रिक्वेष्ट पठाई । मैले स्वीकार गरेँ । धन्यवाद आयो । उनको प्रोफाइल चेक गरेँ । भरखरै बनाएको थियो । प्रोफाइल फोटो राखिएको थिएन । त्यसपछि नित्य नै वार्तालाप हुन थाल्यो ।

उनले मलाई वर्ष, योग्यता, जागिर, श्रीमती केटाकेटी सबैको बारेमा सोधिन् । मैले पनि बताउँदै गए । म विवाहित थिएँ तै पनि उनले मलाई प्रेम प्रस्ताव राखिन् । मैले म विवाहित भएको हुँदा श्रीमतीलाई धोका दिन नसक्ने बताएँ । दिनहरु गुज्रँदै गए ।

एकदिन उनले मलाई “म तपाईंको शहरमा आकी छु । भेटघाट पनि गरौँ, फिल्म पनि हेरौं र मिल्छ भने कुनै होटलमा रात बसेर रमाइला गफ पनि गरौँन” भनिन् । मैले म तिमीसँग बाहिर भेट गर्न सक्तिन बरू मेरै घरमा आउ, मेरी श्रीमतीसँग पनि चिनजान हुन्छ भने । उनले निकै जोड गरिन्, मैले मानिन । उनी रिसाउँदै मलाई नामर्द भनेर अलप भइन् ।

बेलुका म अफिसबाट घर गएँ । घरमा आज विशेष परिकारहरू बनिएको देखेँ । मैले आज के को उपलक्ष्यमा यो सबै गरेकी भनेर श्रीमतीलाई सोधेँ । उनले आज बसन्ती हाम्रो घरमा आउँदैछिन् भनिन् ।

मैले अचम्म मानेर सोधेँ, “तिमी बसन्तीलाई चिन्छ्यौ र ?”
उनले भनिन्, “किन नचिन्नु ! त्यो बसन्ती भन्ने म नै हूँ । मैले तपाईंको परीक्षा लिएँ । तपाईं परीक्षामा पास हुनुभो । त्यसैको उपलक्ष्यमा यो सबै तयारी हो ।”

०००
लालबन्दी, सर्लाही