नेपाली हास्यव्यङ्ग्य अनलाइन पत्रिका

मीनप्रसाद लामिछाने :

(संसदीय सुनुवाई समितिको कार्यालय, सिंहदरबारमा राजदूत सिफारिसका लागि प्रस्तावित राजदूतमाथि लागेका विभिन्न आरोपहरू लगायतका विषयमा बुझ्ने काम भइरहेको छ ।)

प्रस्तावित राजदूतः (हलभित्र प्रवेश गर्दै) अभिवादन हजुर ।
सांसदहरूः अभिवादन । बस्नुस् । खै तपाइँका कागजपत्रहरू हेरौँ ।
प्रस्तावित राजदूतः ( हातमा च्यापेको फाईल अगाडि बढाउँदै) यी लिनोस् हजुर ।
सांसद १ः आफ्नो परिचय गराउनोस् न त । हुन त सबै कुरा यहिँ छ, खाली औपचारिकता लागि मात्र ।
प्रस्तावित राजदूतः म तोलारामको नाति, भोलारामको छोरा, झोलाराम । बसाई यहिँ नेपालटार ।
सांसद २ः भर्खरै सेवाबाट निवृत्त हुनु भएको रहेछ । हैन यो रेस्ट गर्नु पर्ने बेला के को टेस्ट हो फेरि !
प्रस्तावित राजदूतः के गर्नु यो देश र जनताको लागि तपाईंको योग्यता र अनुभवको अझै खाँचो छ भनेर उच्च राजनैतिक नेतृत्वले अनुरोध गरे पछि हार्न सकिनँ ।
सांसद ३ः हैन कसरी सक्नु हुन्छ हो यसरी सबैलाइ खुशी पार्न । तपाईंको नाम त धेरैतिरबाट एकसाथ सिफारिस भएर आएको छ त ?
प्रस्तावित राजदूतः मैले सक्दा र मसँग हुँदा मैले सबैलाई सम्झने गरेको छु सायद त्यै भएर होला उहाँहरूले पनि मलाई सम्झनु भएको ।
पूरक प्रश्नः ल ठिकै छ । अरु अरुलाई त त्यसरी सम्झनु हुँदोरहेछ, खै हामीलाई त कहिल्यै सम्झ्या होइन ।
प्रस्तावित राजदूतः हजुरहरूले मलाई सम्झनु भयो भने म पनि हजुरहरूलाई कहाँ बिर्सन सक्छु र !
सांसद ४ः तपाईंलाई पनि थाहै होला यतिखेर हामी तपाईंलाई लागेका विभिन्न आरोपहरूका सम्बन्धमा तपाईंका धारणाहरू बुझ्ने प्रयास गर्दैछौँ । कतिपय आरोपहरू गम्भीर प्रकृतिका पनि छन्, के भन्नु हुन्छ ?
प्रस्तावित राजदूतः धोबीहरू भगवान रामका पालामा पनि थिए, अहिले पनि छन् त्यसले केहि फरक पर्दैन ।
सांसद ५ः तपाईं त परराष्ट्र विज्ञ पनि है, भनिदिनुहोस् न त हाम्रा दुइ छिमेकी मुलुकहरू चिन र भारतसँगको सम्बन्धलाई हामीले कसरी सन्तुलित गर्नु पर्ला ?
प्रस्तावित राजदूतः सजिलो छ, चिनमा जाँदा हामी एक चिन नीतिप्रति प्रतिवद्ध छौँ भन्नु पर्छ र भारतीयहरूसँग स्वतन्त्र तिव्बतका कुरा उठाउनु पर्छ, दुवै खुशी हुन्छन् ।

सांसद ६ः भ्रष्टाचारमा यो सुन्ने सहनशिलता भनेको चैँ के हो, तपाईंको विचारमा ?
प्रस्तावित राजदूतः शब्द आफैँमा स्पष्ट छ, भ्रष्टाचारका विषयमा उठ्ने कुरालाई ध्यान दिएर, सहनशील भएर सुन्नु पर्छ भनेको । गर्ने आफ्नो सुर त छँदैछ ।
सांसद ७ः अलिक फरक प्रसङ्गमा जाउँ, बङ्गलादेशमा त शेख हसिनाले देश छोडेर भागेपछि नोबेल पुरस्कार विजेता डा.मोहमद् युनुसलाई सरकारको जिम्मा लगाए नि ?
प्रस्तावित राजदूतः नेपालमा पनि त म्यागासेसे अवार्ड बिजेता डा.महावीर पुन छन् त, यो पनि एशियाको नोबेल पुरस्कारै हो ।
सांसद ८ः तपाईंको विचारमा रेल र पानी जहाज पछि सरकारको भावी योजना के हुनु पर्छ अब ?
प्रस्तावित राजदूतः सरकारले अब आफ्नै स्याटेलाईट स्थापना गर्ने कुरालाई जोरसोरले अगाडि बढाउनु पर्छ ।
पूरक प्रश्नः सम्भव छ ?
प्रस्तावित राजदूतः किन नहुनु, पूर्वाधार तयार भइसकेको छ । अग्ला अग्ला डाँडामा बनेका भ्युटावरहरू बेकामी भएर बसेका छन् । त्यैमाथि लगेर राख्नु टक्क राख्दिनु पर्छ, सक्किगो नि ।
सांसद ९ः घरेलु कामदारको रुपमा विदेश गएका महिलाहरूको सुरक्षाको सवालमा केहि सोच्नु भा छ कि ?
प्रस्तावित राजदूतः पहिला देशभित्रै निर्मला पन्तहरूको सुरक्षा कसरी गर्न सकिन्छ सोचौँ, त्यसपछि त्यताको पनि सोच्दै गरौँला ।

सांसद १०ः गठबन्धन परिवर्तनसँगै राजदूत परिवर्तन भैरहँदा विदेशमा नकारात्मक सन्देश जाँदैन ?
प्रस्तावित राजदूतः बिल्कुल जाँदैन, विदेशीहरूले त झन् नेपालीहरू क्या परिवर्तनशील रहेछन् भनेर बुझ्छन् । परिवर्तनशील हुनु त राम्रो कुरा हो नि, हैन र ?
सांसद ११ः तपाईं परराष्ट्रमा भएका बेला युरोपको भ्रमणमा जाँदा साथमा लगेका केहि युवाहरूलाई उतै विदेशमै छोडेर आउनु भयो रे भन्ने आरोप पनि छ नि तपाईं माथि ?
प्रस्तावित राजदूतः छोड्या होइन, छुट्या हुन् । युरोपको त्यो चकाचौंधमा काँ छुटे छुटे । खोज्या पनि हो, नभेटेसि के गर्नु ।
सांसद १२ः तपाईंले महिला, बालबालिका तथा समाज कल्याण मन्त्रालयमा रहँदा मन्त्रालयकै एकजना महिला कर्मचारीमाथि यौन दुर्व्यवहार गर्नु भयो रे भन्ने आरोप पनि छ नि, के भन्नु हुन्छ ।
प्रस्तावित राजदूतः ए… त्यो पुरानो कुरा । हल्का मिस्टेक भा हो, त्यो मैले मिलाई सक्या छु ।
सांसदहरूः यौन दुर्व्यवहारका कुरालाई नि हल्का रुपमा लिन मिल्छ ?
प्रस्तावित राजदूतः दुर्व्यवहार नै हैन त्यो । जोरजबर्जस्ती हो र दुर्व्यवहार हुन ? सहमतिमा भएको कुरा ।
सांसद १३ः गृह मन्त्रालयमा रहँदा कर्मचारीको सरुवा बढुवाबाट पनि मोटो रकम हात पार्नु भयो रे भन्ने पनि आरोप छ नि तपाईंमाथि ।
प्रस्तावित राजदूतः के हात पारेँ भन्नु, सबैतिर छर्दा मेरो हातमा त कति रह्यो र !
सांसद १४ः तपाईंले त उमेर ढाँटेर जागीर खानु भयो रे भन्ने आरोप पनि छ नि !
प्रस्तावित राजदूतः ए त्यै जन्ममिति फरक परेको कुरालाई भन्न खोज्नु भा होला, नागरिकता पुरानो भ’र प्रतिलिपि निकाल्न ग’को, फाँटवालाले मिस्टेक गर्देछ भन्या !
सांसद १५ः अनि तपाईंले त आफ्नो घर हुँदाहुँदै घरभाडा सुविधा पनि लिनु भयो रे !
प्रस्तावित राजदूतः काँ मेरो घर हुनु । त्यो कोटेश्वरको घर ठुलो छोराको, बानेश्वरको कान्छाको, म नेपालटारमा श्रीमतीको घरमा बसिराछु अहिले ।
सांसदहरू: तपाईंसँग त युरोपको पि आर पनि छ रे !
प्रस्तावित राजदूतः धरोधर्म छैन । तामातुलसी हातमा लिएर किरिया हाल्न सक्छु, कस्तो कुरो गर्या होला !

पूरक प्रश्नः छोरा, छोरी, म्याम पनि उतै युरोपतिरै हुनुहुन्छ क्यारे उहाँहरूसँग चैं होला !
प्रस्तावित राजदूतः अब उनीहरूको कुरो चैँ उनीहरूलाई नै सोध्नोस् है, मलाई था छैन ।
सांसदहरूः अन्त्यमा, भनिदिनोस् न त तपाईंलाई नै छनौट गर्नु पर्ने चैँ किन ?
प्रस्तावित राजदूतः म जत्तिको योग्य, अनुभवी, इमान्दार अनि सरकारप्रति बफादार त अरु हुनु पनि पर्‍यो नि !
सांसदहरूः हस्, तपाईं अहिले जान सक्नु हुन्छ ।

(स्मरण रहोस् संसदीय सुनुवाईको प्रक्रिया पूरा गरेर बहुमत सांसदहरूले उहाँलाई राजदूतमा सिफारिस गर्नु भएको छ ।)

०००
हेटौंडा- ४, मकवानपुर