नेपाली हास्यव्यङ्ग्य अनलाइन पत्रिका

नरेन्द्रराज पौडेल :

चेलीका कुटुरी र थैली, बटुवा फोरी खुतुर्के लग्यो
लैना गाई दुधालु भैसी र खसी दाम्ला फुकाली लग्यो
धोक्रा धान मकै र मासतिलका नाम्ला फुकाली लग्यो
लाजै छैन अझै म स्वच्छ, गतिलो भन्दैछ हूँडार त्यो

आयो राम अवश्य फेर्छ यसले देशै सपार्ने जुनी
उल्लू छानी लगाइ झप्पू यसले उत्पात गर्नेछ नि
यै हो नाथ अनाथको भनी चल्यो आशाबरीको धुन
चल्ला चोर परेछ त्यो गरिवको पिँउँदै छ आलो खुन ।

गाई गीत मिठा मिठा फनफनी घुम्दै र नाँच्दै गरी
आयो सुन्दर त्यो मयूर जिउमा रङ्गीन बुट्टा भरी
एक्कासि जव प्वाँख चैं झरिगयो निर्बाङ्ग काया भयो
बूढो बाज रहेछ घरघरपसी चल्ला शिकारी भयो ।

केले ढाक्नु म यो शरीर कसरी जोगाउने हुर्मत
दुब्ला रुग्ण खियाउटा यी टुहुरा के ख्वाइ पालौं अब
मेरै किस्मतको लुटेर पशिना साँडा बनेको छ त्यो
एैले पर्न गएँ म आफू पथरा उद्धार खै गर्छ को ?

काऊसो कि लुतो जनाइखटिरो यो दुःखमात्रै दिने
या हो यो अरिँगाल बिच्छी बनको डस्ने र छोडी दिने
वनढाडे चितुवा अजिंगर कि हो लुछ्ने र खाने सदा
आफ्नै पूत कपूतदेखि जननी रुन्छिन् सदा सर्वदा ।

०००
नयाँ बानेश्वर ।