नेपाली हास्यव्यङ्ग्य अनलाइन पत्रिका

डा. टीकाराम पोखरेल :

अन्तर्राष्ट्रिय प्रेम सम्मेलनको आयोजना गरिएको थियो ।
सम्मेलनको आयोजक थियो‐ ‘विश्व प्रेम सञ्जाल’ । प्रविधि सम्बन्धी काम गर्ने ठूला ठूला आधुनिक कम्पनी सम्मेलनको प्रायोजक बनेका थिए ।

विश्वका ठूला ठूला प्रेम विज्ञहरु प्रेम सम्मेलनका सहभागी थिए । सम्मेलनमा प्रेम सम्बन्धी स्टलहरु राखिएका थिए । एउटा स्टलमा प्रेम कसरी गर्ने भनेर सिकाइँदै थियो । अर्को स्टलमा प्रेम सम्बन्धी पुस्तकहरु थिए । अर्कोमा प्रेम गर्दा प्रेमीप्रेमिकालाइ दिने उपहारहरु राखिएको थियो ।

भर्खरै शहरमा खुलेको प्रेमशास्त्र पढाउने कलेजले पनि निशुल्क भर्नाको स्किमसहितको स्टल राखेको थियो । स्टलका भित्ताभरि प्रेम सम्बन्धि चर्चित भनाइहरु टाँसिएका थिए ।

एक कुनामा प्रेम सम्बन्धी कथा लिखिँदै थिए । कविता वाचन हुँदै थिए । अर्कातर्फ प्रेमसम्बन्धी कार्यपत्रहरु प्रस्तुत हुँदै थिए । एक साइडमा प्रेम सम्बन्धी चित्र प्रदर्शनी थियो भने अर्को साइडमा प्रेम सम्बन्धी फिल्महरु देखाइँदै थियो ।

हरेक दिन साँझपख प्रेम कन्सर्ट हुन्थ्यो ।
जो कोही पनि सम्मेलन स्थल पुग्दा लाग्थ्यो‐ ‘त्यहाँ प्रेम सम्बन्धी नभएको केही छैन ।’
त्यहाँ नभएको एउटै मात्र कुरा थियो– ‘प्रेम ।’

०००
काठमाडाैं