नेपाली हास्यव्यङ्ग्य अनलाइन पत्रिका

रवीन्द्रनाथ त्यागी :

व्यङ्ग्यानुवाद : रमेश समर्थन

मान्यवर,
तपाईंको दिनाङ्क तेइसकाे पत्र पाएँ । तपाईंले आफ्नाे राेयल्टीकाे हिसाब अहिलेसम्म नपाएको र यसै विषयलाई लिएर तपाईंले निकै दु:ख झेल्नुपरेकाे कुराे थाहा पाएँ । यस सन्दर्भमा तपाईंले आफ्नाे हिसाब नपाउनुकाे कारण हामीले नै यहाँबाट पठाउँदै नपठाएकाे हाे भन्ने निवेदन गर्न चाहन्छु । यता हामी एउटा प्रेस स्थापित गर्न व्यस्त भयाैं जसकाे लागत झन्डै पचास लाख आयाे । सबै लेखकहरूकै कृपा हाे । अब तपाईंका किताबहरू समीक्षाका लागि पढ्नै नपर्ने गरी सानका साथ छापिने छन् । हेर्नु मात्र नै पर्याप्त हुनेछ । “खाम हेरेर नै तिमीले पत्रकाे विषय थाहा पाउनुपर्ने छ ।” भनेझैं ।

याे वर्ष राम्राे रहेन । तपाईंजस्ता लाेकप्रिय लेखकका किताब पनि त्यति धेरै बिकेनन् । हालत कतिसम्म बिग्र्याे भने पाेहर बिकिसकेका पनि केही प्रति त फिर्ता आए । एकातिर त यस्ताे अवस्था रह्याे भने अर्कातिर धमिराले पनि धेरै साहित्य खाइदियाे । पाठकहरू निष्क्रिय रहे अनि धमिराहरू सक्रिय रहे ।

तीस रुपैयाँ दस पैसाकाे चेक संलग्न छ । रसिद पठाउन नबिर्सनुहाेला । याे राशि तपाईंको प्रतिष्ठालाई हेर्दा केही कम हाे भन्ने कुराे हामी स्विकार्छाैं तर ती लेखकहरूका बारेमा पनि साेच्नुस् जसलाई हामीले तीस रुपैयाँ पनि कहिल्यै दिएका छैनाैँ । एउटा अर्काे कुराे । तपाईं यी कविता र व्यङ्ग्यआदिकाे जालमा कहिलेसम्म अल्झिनुहुन्छ ? अपराध, सेक्स, जासुसी अनि अनैतिक प्रेमजस्ता विषयमा किन केही लेख्नुहुन्न ? हाम्राे यस सुझावलाई गम्भीरतापूर्वक लिनुहाेला र समयकाे लाभ लिनुहाेला । सके तपाईंले त्यस्ताे एकजना व्यक्तिका बारेमा सुन्नुभएकाे पनि हाेला जसकाे हातबाट एकपटक फुस्केकाे समय फेरि कहिल्यै फर्केर आएन । ठिक त्यस्तै जस्ताे एकपटक तपाईंको पाण्डुलिपिका साथमा पनि भएकाे थियाे ।
शेष कृपा ।

०००
हिन्दीका प्रखर व्यङ्ग्यकार रवीन्द्रनाथ त्यागीकाे हास्यव्यङ्ग्य सङ्ग्रह “प्रतिनिधि व्यङ्ग्य” भित्रकाे ” लेखक के नाम पाँच पत्र” भित्रकाे दमदार व्यङ्ग्य “प्रकाशक का पत्र” काे नेपालीअनुवाद ।