नेपाली हास्यव्यङ्ग्य अनलाइन पत्रिका

अर्जुन दाहाल (क)

यही मंगलबार बिहान सुतिरहेको बेला ड्वाङ केही ढले जस्तो आवाज सुनियो। म झसङ्ग भएँ। दायाँबायाँ नगरी के रहेछ भनेर सामाजिक सञ्जाल हरिहालें। किनकि अहिले जे भए पनि सामाजिक सञ्जालमा नै आउने हो, त्यहीँ देख्ने हो। पूर्ण रिजाल गुरुको पोस्ट सुरुमा नै भेटियो। कुरो रहेछ प्रचन्न कम्रेड कम्जोर भएको कारण कम्बोटमा ढल्नुभएको।

नाताले काका, उमेर पनि झन्डै ७० खाका प्रचन्न बा ढलेको कुरा थाहा पाए पछि चिन्ता बढ्यो। केही असत्तीले रिप पनि लेखेछन्। तर रिपको अर्थ खराब रहेनछ “रिकभर प्लिज” भन्ने सकारात्मक अशयका साथ लेखिएका कमेण्टलाई गलत बुझ्ने त कुरै भएन। गंगा बहिनीको स्टाटुस पनि आइहाल्यो। भारत चीन अमेरिका सबै तिर हल्लाखल्ला भो। अमेरिकाले एक टाँका भारतले एक टाँका र चीनले एक टाँका गरि जम्मा तीन टाँका लगाएपछि उहाँ अहिले सकुशल हुनुहुन्छ भन्ने सुनियो।

उहाँ बाथरुममा ढल्नुभयो भनेर सबै भन्दा पहिला स्टाटुस चाहिँ माननीय योगेशले राख्नुभएको रहेछ। जे होस् गणतन्त्रको नेतृत्व गरेका नेता ढल्दा देश विदेशमा यतिको चिन्ता, चियो, चर्चो, चासो हुनु स्वाभाविक हो। ठूला नेता भरसक नढलुन् । उहाँहरुले देशको विकास गर्न अझै केही वर्ष बाँकी नै छ। नत्र विदेशमा रहेका नेपालीहरुले विदेश बनाइसकेपछि विदेश नै बसाइँ सरेर विदेश नै हामीले बनाएको देश भन्न पनि उहाँहरुलाई अधिकार छ। टाउकोमा लगाइएका टाँकामा इन्फेक्सन नहोस्, शुभेच्छा।

०००
(व्यङ्ग्य लेखक नुन चिनी पानी अमेरिकाका परिकल्पनाकार हुन् )