नेपाली हास्यव्यङ्ग्य अनलाइन पत्रिका

चिरञ्जीवी दाहाल :

केही मान्छे थिए जम्मा, भेला बन्यो निकै घना
यथार्थमा तिनै मान्छे, नाङ्गा देखेँ सबै जना ।१

देखिन्थ्यो बाहिरी वस्त्र, तर नाङ्गा कठै उनै
शान देखाउने मध्य, बोल्दा बाङ्गा थिए कुनै ।२

केही मान्छे थिए बेस, उपद्रो भिडमा पनि
कठैबरा थिए चुप्प, उपस्थित हुँदा पनि ।३

सहभागी अधिकांश, भद्रको स्वाङ रच्दथे
तिनै लुट्ने कुरा गर्दै, कसैका कान भर्दथे ।४

वर्षौ निन्द्रा नपर्नेले, सुत्ने सूत्र बताउँथ्यो
सभाका बीचमा उँघ्ने, चुस्त बन्न सिकाउँथ्यो ।५

हल्ला गर्दै थिए मान्छे, दाम चढाउनेहरू
विघ्न मच्चाउँदै भागे, काम बढाउनेहरू ।६

मान्छे झुक्याउने भेला, भो पुग्यो अब जान्न म
व्यभिचारी ‌र पापीले, दिएको पनि खान्न म ।७

०००
चितवन ।