नेपाली हास्यव्यङ्ग्य अनलाइन पत्रिका

भाेजराज रेग्मी मुखाले :

आ–आफ्ना आस्थाको कित्तामा विभक्त भक्तहरू महामारीको सन्त्रासले आकुल ब्याकुल भए । यो सङ्कटबाट मुक्ति पाउन भक्तजन आलापविलाप सहित प्रार्थना गरिरहेको देखेपछि भगवानहरूलाई पनि अमन चयन भएन । सबैले आ–आफ्ना आसनबाट ध्यानदृष्टि लाएर मत्र्यलोकतिर दिव्यचक्षु घुमाउँदा सबैले आ–आफ्ना प्रभुलाई पुकारा गरिरहेको देखे । गाउँका भन्दा शहरका भक्तजनहरू धेरै नै आत्तिएका देखिए ।

भक्तहरूको पाखण्डी व्यवहारको कारण मनुष्यले तोकिदिएको स्थल छोडेर भगवानहरू सुटुक्क अन्तै बस्ने गरेका थिए । सबै भक्तहरू अर्थ स्वैच्छिक बन्दाबन्दीमा रहेकाले कोही पनि मठमन्दिर, मस्जिद, गुम्बा र गिर्जाघर नगई आफ्नै वासस्थानबाटै भगवानलाई पुकारिरहेका थिए ।

यस्तो दुरावस्थामा कम्तिमा पनि आ–आफ्ना भक्तहरूलाई यो सङ्कटबाट पार नलगाउने हो भने भयङ्कर अनर्थ हुनेछ । ईश्वरप्रति नै अनास्था उत्पन्न भई अराजकता शुरू हुनेछ । तसर्थ यथाशीघ्र ठोस कदम चाल्नै पर्ने कुरामा भगवानहरूको मतैक्यता भयो । तर, एउटा कुराले भने समस्या खडा गर्ने भो । आ– आफ्ना भक्तहरूको जाँदा मान्छेहरू धुइरो लागेर अर्को उपद्रो हुने खतरा देखेपछि फरक फरक ठाउँमा पुगेर अवलोकन गरी प्रतिवेदन तयार गरि भक्तजनहरूको प्याकेजमै कल्याण गर्ने सहमति भयो । भगवानहरू आपसी सहमतिअनुसार आ–आफ्ना क्षेत्रमा खटिए ।

बाघको छालाको कछाड, सर्पको माला लगाएको जोगीलाई देखेर कृस्तानहरू झस्किए । यो जोगी पक्कै पनि हामीलाई कोरोना फैलाउन आएको हुनुपर्छ भनेर चिच्याउन थाले । महादेवले चुँइक्क बोल्न नपाई कृष्चियनहरूले लधारेर नजिकैको क्वारेन्टाइनमा हाल्दिए । नमाज पढ्न लागेका मौल्वीलाई बुद्धले केही भन्न खोज्दै थिए, मुसलमानहरू कोरोना सल्काउन आएको सन्यासी भन्दै लखेटेर क्वारेण्टाइनमा हाल्दिए ।

यही हालत भोग्दै पैगम्बर मोहम्मद र येशुखृष्ट पनि क्यारेण्टाइनमा कोचिन पुगे । यता सबै भक्तजनहरू आफू बालबाल बच्न सफल भएकोमा भगवानको जयजयकार गर्दै लकडाउनमा कडाई नगरेको भन्दै सरकारको आलोचना गर्दैछन् भने सरकारी र निजीमिडियाहरू क्यारेण्टाइनबाट शङ्कास्पद चारजना व्यक्तिहरू भागेको र तिनको खोजी कार्य भइरहेको खबर
फुकिरहेका छन् ।

०००
सद्य विमोचित ‘जंगबहादुरको फ्रेन्ड रिक्वेस्ट’ बाट