नेपाली हास्यव्यङ्ग्य अनलाइन पत्रिका

शेषराज भट्टराई

जेनजी आन्दोलनबाट सिर्जिएकाे हाे याे चुनाव । यसमा केपी ओलीकाे ठूलो याेगदान छ । किनकि उनले दुई हजार बयासी भदाै तेईस गते ती अबाेध बालबालिकाको कन्चट छातीमा केही गाेलीगट्ठा खर्च नगरेकाे भएदेखि हामीले मतदान गर्न कहाँ पाउँथ्याैँ र ? म पनि सरकारलाई सहयोग हाेस् भनेर एकदिन पुरै पसल बन्द गरी घाटा बेहाेरेर एउटा असतीकाे लुटचिन्हमा छाप ठाेक्दै लुट्ने माैका दिएर आएँ । भन्न त मताधिकारकाे सदुपयाेग भन्छन् तर यसभन्दा अगाडिकाकाे भ्रष्टाचारको ताल हेर्दा त दुरुपयाेग नै हाे कि झैं लागिरहेको छ । अबकाे स्वाँठले देश र जनताकाे ह्याकुलाे हँसाउन सकेन भने यस्ता मतमा बिमत जारी गर्नुपर्ला । अहिलेलाई फेरि एकपटकलाई महामुर्ख भइयाे भनाैनँ न ।

हामीले जिन्दगीमा धेरै पटक मत दिइसकेका छाैं । तर जसलाई मत दियो त्यो नेताे जितेर यति ठूलो भयो कि त्यसपछि हाम्रो आवासमा फर्किएर पनि आएन। हामीलाई चिन्दा पनि चिनेन । उसले महँगा गाडीमा सयर गर्न थालेपछि उसकाे पयर देख्न पनि छाेडियाे । उसका शाखासन्तानले ठूलाठूला अड्डा अदालतमा डढ्डा पल्टाउने भए तर आफूचाहिँ जहिले पनि गुन्द्रुक र ढिंडाे पल्टाएरै आँखा पल्टाउने बेला भैसक्याे । न आङमा घाम लाग्छ न टाङमा । हरिबिजाेक छ हजुर हाम्रो त ।

जेहाेस सुशीला आमैले आम चुनाव गरेरै छाडिन् । यस्तो बहादुर कामकाे मत परिणाम ककस्काे पाेल्टामा पर्याे भनेर अहिले परिणाम हेर्दा थाहा हुँदै छ । तर जस्ले सत्ताकाे स्वाद लिन्छ त्याे असनकाे साँढे चाहिँ अवस्य हुन्छ हाेला । किन भने तीन दशकदेखि त्यस्तै देखिँदै आएकाे छ। त्यसले आफू बाहेक कसैलाई गन्दैन चिन्दैन । याे शासनको मात हाे जुन मदिरा भातभन्दा ज्यादा लाग्छ ।

मत दिन्न भन्दाभन्दै आफ्नो त कमलाे मन आज नदिए भाेलि त दिउँदिउँ लागिहाल्छ । यसलाई नदिए तेसलाई दिउँदिउँ लाग्छ । पाखामा नदिए पानीमुनि गएर भए पनि दिन मन लागिरहन्छ । याे मत पनि हिजै अस्तिकै दिनदेखि दिन मन लागेर खप्नु खेप्नुनै भएन र फागुन २१ बिहानकाे भातभान्सा डकारेर मतदान केन्द्र तर्फ लागियाे भालेपाेथी । जेष्ठ नागरिक भैटाेपलेकाे हाम्रो पनि भत्ता बुझ्ने दिन नजिकिँदै छ भनेर बुढीकाे हात समाएर बिस्तारै हिँडाउँदै लगेँ । खुट्टा दुख्यो, कैंडा लाग्याे भन्दै थिइन् । चुप लागेर थपक्क हिँड भन्दै झर्काेफर्काे गर्दै मतदान स्थलमा पुर्याएँ ।

बुढाबुढीलाई बस्ने ठाउँ पनि थिएन । जलपान भित्रभित्र त छ कि जस्तो लाग्यो बाहिर चाहिँ घाँटी भिजाउने पानी पनि थिएन । टन्टलापुर घामले गर्दा काेही रुखकाे छायामा बसेर धकी रहेका थिए । काेही काेही लाै मरिने भैयाे भन्दै रामनाम जप्दै मनमन्दिरकाे घण्टी हल्लाई रहेका थिए । काेही चाहिँ यस्ताे माैका कहिले आउँछ र भन्दै मादल बजाएर माटाेमा बुर्कुसी मारिरहेका थिए । काेही चाहिँ गएर हलाे जाेत्नु छ भन्दै थिए त काेही चाहिँ छाता ओडेर रेडियाे सुनिरहेका थिए ।

सबै आआफ्नो तालमा झुमेकाे देखेर मेरी दुलहीले हामी पनि नाचुँ न भन्दै मतदान अधिकृतकै अगाडि खुट्टा बटार्न खाेज्दै थिइन् । बिचरा थकानग्रस्त सुरक्षाकर्मीलाई केमा चित्त बुझेन कुन्नि आकाशतिर फर्किएर हवाईफायर गरिहाल्याे । त्यसपछि तर्सिएर टाप कसेकी मेरी दुलही कहाँ अन्मरिछ भन्दै खाेजी गर्दैजाँदा एकैचाेटी मतगणना स्थलमा फेला परिन् । अब मत परिणाम घाेषणा नभएसम्म पानी पनि खान्न घर पनि जान्न भन्दै बज्रासनमा बसेकी छन् । म पनि श्रीमती छाेड्न नसकेर त्यही स्थानबाट भुँडीमा रङ्गीबिरङ्गी सारङ्गी बजाउँदै याे लेख पाेष्ट्याउँदै छु ।

म त दुई हजार बयासीकाे मत दिन पाउँदा कार्कीनी बज्यैलाई उधुम धन्यवाद दिएर कता कुदुम भैरहेकाे छु । मलाई त महिलाले गरेकाे महाकाम खुब रुच्याे । हजुरले पनि हजार हण्डर भुलेर खुलेर बधाई भन्नुस् है ।

०००
फूलबारी ११ पाेखरा कास्की ।
फाेन ९८०६६७७५९४