नेपाली हास्यव्यङ्ग्य अनलाइन पत्रिका

कोरोना कति कामले यति छिटो नेपाल आयौ तिमी
नेपालीसँग लान योग्य छ र के खोजेर धायौ तिमी
हुर्केका बलिया र शिक्षित सबै छोरा र छोरीहरू
कोही छैन यहाँ विदेसिन पुगे बस्छन् लफङ्गा अरू ।१।

हाम्रो शीप विदेशकै धन बन्यो रित्तो छ हाम्रो घर
बाँझै खेत छ पाखुरा जति सबै बस्छन् कमारो पर
वृद्दावृद्धहरू लगेर गतिलो सौगात के पाउँछौ
रोगी छन् दमका तथा सुगरका के स्वाद भेट्टाउँछौ ।२।

आयुर्वेद सिकाउने गुरु यतै धामी र झाँक्री यतै
जान्ने धार्मिक साधनारत यतै नेता र जेथा यतै
मन्त्री छन् यस देशमा घरघरै बेसार पानी दिने
कोसेली दिन योग्य के छ र यहाँ आसा नराखे लिने ।३।

मन्त्री सांसद भेट गर्न त यहाँ आफन्तले पाउँछन्
सक्छौ लाउन साइनो यदि भने सौगात टक्राउँछन्
हामी ढुक्क भएर सङ्कटहरू मागेर नै टार्दै गयौँ
माग्ने सीप कला र तौरतरिका उत्पात जान्ने भयौँ ।४।

जाऊ झट्ट यहाँ बसेर गतिलो पाइन्न केही पनि
झार्दै र्‍याल लिसो बनेर नबसे केकेन मिल्ला भनी
मान्छे मार्न म आउँला नभन भो धम्की नदेऊ अति
यस्ता काम गरेर खप्पिस भयौँ को मार्छ हाम्रा जति ।५।

रित्तो हात हुँदैन भारत हुँदै नेपाल आयौ भने
सक्छौ रित्तिन चाइनातिर पसी बाटो बिरायौ भने
धेरै दिक्क लगाउँछौ यदि भने छेकेर चारैतिर
देशैभित्र थुनेर राख्नु नपरोस् पर्छौ तिमी मुन्तिर ।६।

आफ्नै यस्तो गतिभो तिमी लिन भनी यै देशमा आउछौ
धेरै आस नराख यो मुलुकको धोका तिमी पाउछौ
जाँदैजान्न भनेर जब्बर बने थालिन्छ घोक्र्याउन
जा राम्रो मुखले भन्यौँ अब यहाँ पाइन्न कोही छुन ।७।

प्राप्चा, ओखल्ढुङ्गा