नेपाली हास्यव्यङ्ग्य अनलाइन पत्रिका

राखेर धितो पाश्चात्य मठमा
आफ्नो सिंगो संस्कृति
“म तिमीलाई माया गर्छु” भन्न
कुनै विशेष “डे” नै
पर्खेर बस्ने किन ?

सांस्कृतिक विरासतलाई
अल्झाएर उनको आदेशमा
उद्घोषित मायापुरीमा
फुटानी लाउँदै परजीवी बनेर
फस्ने किन ?

मायाको बीउ
ढिलो गर्दा बिग्रन पनि सक्छ
आआफ्नो हिस्साको माया उमार्नुस्
मनको कोमल माटोमा ।
धेरै पर्ख्नु भयो तारीख,
अब थप पर्खने किन ?

कागले कान लग्यो भन्दैमा
आफ्नो कान नै नछामी
कागको पछाडि दौडिनाले
हाम्रो बिग्रेको छ व्यवहार
र संसारभरि उनको
बजार छ गुलजार ।

यहाँ त प्रत्येक क्षण
माया आवाद छ, तन्नेरी मुटुहरूमा,
वृद्धाश्रममा पुर्याएर आफ्ना
रीतिरिवाज परम्परालाई
प्रेमीलाई टक्र्याउन
“एक रातो गुलाफ”
उनले तोकेको तारीखमै
माया-मन्दिरमा पस्ने किन ?

विराटनगर