नेपाली हास्यव्यङ्ग्य अनलाइन पत्रिका

सलबलाउन थालेका छन्,
नक्कली रंगीन सपनाका
ब्वाँसा बेपारीहरू!
गाउँका द्यौराली चौपारी पँधेराहरू हो !
शहरका गल्ली चोक र डबलीहरू हो !
आफ्नो ख्याल आफै गर्नू !
आफ्नो सुरक्षा आफै गर्नू !
यी सपनाका बेपारीहरू आफू अघाउन मात्र
जानेका हुन्छन् !
जसरी हुन्छ शिकार हात पार्नुलाई आफ्नो एकमात्र धर्म
ठानेका हुन्छन् !
निसासिन विवस विभत्स बर्तमान साछी छ
हिजो पनि यिनै बेपारीले
फकाएर,
असलमा छकाएर
तिमीलाई शिकार बनाएकै हुन् !
तिम्रो भित्राँस खाएकै हुन् !
याद राखौं,
घरीघरी एउटै गल्ती दोहोर्‍याइराख्नु
अक्षम्य अपराध ठहर्छ !
प्रष्टै छ,
अपराधको सजायँ भोग्नु पर्छ !
कति भोग्छौ ?
अझ पनि केही भोग्न बाँकि छ र ?
आज म यत्ति भन्छु,
तिम्रो निजी सपनाको,
चिहान खनिनु हुन्न !
मतसँग आफ्ना सपना साट्नु अघि,
आफैले आफैलाई एकपटक सोध्न न बिर्सनू !-
मैले कतै गल्ती दोहोर्‍याइरहेको त छैन ?
साँच्चिकै आफ्नो अस्तित्वको चिन्ता छ भने,
यो नगरी हुँदैन !!

भैरहवा