नेपाली हास्यव्यङ्ग्य अनलाइन पत्रिका

गाउँ गाउँ पुग्यो उडेर सजिलै त्यो सींहदर्बार रे !
झुप्राका हलिया, किसान, भरिया सारा त्यसैमा सरे !!
कोही छैन गरीब भोजन, लुगा, शिक्षा निशुल्कै भयो ।
देखेथ्यौ सपना तिमी अघि ! नयाँ नेपाल साँच्चै भयो ।।

कोही जान्न विदेश, देशभरमै उद्योग छन् ठुल्ठुला
पुग्दा पाइप ग्यासका घरघरै बल्छन् सबैका चुला !
दौड्यो रेल विमान तुल्य छरितो क्या क्या चमत्कार भो !
स्वर्गै हो, म त दङ्ग पर्दछु, नयाँ नेपाल साँच्चै भयो ।।

कालीबाट निकालि दिव्य बिजुली बेच्छौँ छिमेकीकन
खानीबाट फलाम, तेल, सुनकै थुप्र्याइराख्छौँ धन
आयातै नगरे हुने अब भयो, ठुलो समस्या गयो !
हामी छौँ सब आत्मनिर्भर ! नयाँ नेपाल साँच्चै भयो ।।

बुच्चे छन् जनता सबै, मुलुकको चुच्चे छ नक्सा तर !
बोक्सी, छाउप्रथा, छुवाछुत सबै छर्लङ्ग ! छूः मन्तर !!
भ्रष्टाचार हटेर निर्मुल भयो त्यो कोशबाटै गयो ।
आहा क्या रमणीय ! सुन्दर !! नयाँ नेपाल साँच्चै भयो ।।

पैलेका अति ब्रम्हशत्तुरहरू भाइ भए रे सब !
कोही छैन गधा नुहाई दुधले गाई भए रे अब !!
गर्दैनन् झगडा लडाइँ लडने खेलो उहिल्यै गयो ।
कस्तो सुन्दर शान्त देश छ ? नयाँ नेपाल साँच्चै भयो ।।

राजा एक थियो, सयौँ किसिमका राजा यहाँ देखिए !
रैछन् रावण पो र ! देश सुनकै यिन्ले बनाईदिए !!
झुक्किन्छन् बुझ राम देश नचिनी लङ्का फिका भैगयो !
स्विट्जर्ल्यान्ड बनेछ रे अब ! नयाँ नेपाल साँच्चै भयो ।।

रुरुक्षेत्र – ५, सुन्डाडा, गुल्मी
फोन नं. ९८४७२१६७७७

(गोकर्णेश्वर न.पा.द्वारा चैत १८ गते आयोजित राष्ट्रिय हास्यव्यङ्ग्य कविता प्रतियाेगितामा सान्त्वना पुरस्कार प्राप्त)