होम सुवेदीमतदान कता गर्ने ?
माग्न राँगाहरू आए माग्न आए थुँबाहरू मतदान कता गर्ने दुविधा भो कसो गरूँ ।
बाटो टोल मुहल्लामा
गोब्र्याएर हिँडेपछि
प्रतिकार कहाँ गर्नु
राँगा डाँगा भिडेपछि ।।
म दिन्छु दूधको खोलो
सबैले खानुहोस् खिर
भनी माग्न यता एक
साँढे आयो अघिल्तिर ।।
आयो भीमसिने बोको
भन्दै पाठा म पाउँला
मतदान गरे आजै
उल्टो खोलो बगाउँला ।
हाइना भन्छ आएर
नौलो घाम बनाउँछु
अहिंसा शान्तिको पाठ
जिताएमा पढाउँछु ।।
छरी दुर्गन्धको हस्को
सिङ्गै टोल छ दूषित
भन्छ भीमसिने बोको
टोल यो छ सुवासित ।।
भुस्याहाको यता लर्को
लागेको छ घरी घरी
पढाए प्रेमको पाठ
ङार्रङुर्र गरी गरी ।।
हड्डीमा अहिल्यै लड्डी
गर्नेको छ कुलच्छिन
सिनोमा गिद्ध झम्टेझैँ
देखियो गठबन्धन ।।
माग्न राँगाहरू आए
माग्न आए थुँबाहरू
मतदान कता गर्ने
दुविधा भो कसो गरूँ ।।
भद्रपुर, झापा
Subscribe
Login
0 Comments
Oldest
