नेपाली हास्यव्यङ्ग्य अनलाइन पत्रिका

भोटमाग्दा चोट खाए नोट खाने अर्कै
नेता बने कमाउन जित्ने भयो अर्कै
खर्च भयो करोडौको भोट आयो शुन्य
हार्ने भए म त अब कमाउदिन पुन्य ।

जनताको मनभित्र म बसिन किन ?
केही गल्ती गरे कि त दान उपहार लिन
आफूलाई नेता ठाने खाइलाग्दो थिएँ
भ्रष्टाचारी लोभि पापी पद मैले लिएँ ।

आ आफ्नो विशेषताले भरिपूणर् मान्छे
साथ दिने ठूलै थिए बन्न खोजे भान्से
अहिलेको माग पनि यस्तै खाले थियो
यस्तै मान्छे खोजी खोजी पार्टीले नै लियो ।

जि हजुरी गर्दा गर्दा कति दिन बिते
बल्ल तल्ल नेता जीको मैले मन जितँे
पाएँ टिकट जोड बलले कमाउनु पर्छ
हेर्दै जाउँ कुनै बेला साढेको फल झर्छ ।

नेपालको राजनीति हो के के हुन्छौँ हुन्छौँ
हामी नेता औँठा छापमै हरेक जाल बुन्छौँ
कानून बेत्ता किन चाहियो औठा छाप काफी
मुर्ख जनता ढाँटछल गर्न हामी आफैँ गफी ।

जनता मुला भेडा बाख्रा पेल्नु पर्छ धैरै
हाम्रो पाटी छाडे भने ठेल्नु पर्छ परै
हामी नेता माथि माथि जनता तल तलै
यो देशको विकासमा शुन्य भयो फलै ।

भ्रष्टाचारका नायक हामी कमाउँछौ फेरी
नेपालमा छुट छ सबै गर्छौ मनपरी
जनता मुला कराउँछन सुन्नु हुन्न कुरा
हाम्रो बोली बिक्छ भोलि हुन्छौं आफैँ सुरा ।

उदयपुर