खगेन्द्र नेउपानेचुनाव
मस्तिष्कको कोमामा अधमरो बनाएर कृत्रिम अक्सिजनमा जबर्जस्ती जीवित हुन्छौं हामी र त्यसैको किराया मोल तिरिरन्छौं ।
हामी त्यहि पात्रहरू हौं
चुनाव पर्खेर बसेका
हरेक पल्ट
झोलाबाट मकै भट्मास बाँडे जस्तो
आश्वासन बाँड्दै आउँछन् साथीहरू
सट्टामा मोल तिर्छौं
चर्को घाममा लामो लाइनमा बसेर
भोट दिन्छौं ।
मतपत्र जस्तै
अक्षरको अल्कोहलबाट
मक्किंदै जान्छौं
एउटा खोक्रो बिरासत
मस्तिष्कको कोमामा अधमरो बनाएर
कृत्रिम अक्सिजनमा
जबर्जस्ती जीवित हुन्छौं हामी
र
त्यसैको किराया मोल तिरिरन्छौं ।
लोकतन्त्र पनि कति निर्मोही
हाम्रा आवश्यकता प्रति उदासिन
हाम्रा आवाजहरू प्रति निर्वचन
तर पनि
छातिको लब्धांक खोकिलोमा
आस्थालाई
मतपत्रभित्र पोको पारेर चुपचाप खसाइरहन्छौं हामी
चुपचाप एकदमै चुपचाप ।
गौरादह, झापा
