नेपाली हास्यव्यङ्ग्य अनलाइन पत्रिका

म कवि हुँ र/म स्वीकार गर्छु-
जाडोको कविता-
मैले सिरक ओडेर लेखेको हुँ !
म स्वीकार गर्छु-
आँसुको कविता रक्सी पिएर लेखेको हुँ !
म स्वीकार गर्छु-
तन्न अघाएको बेला-
भोकको कविता लेखेको हुँ !

मनमा घृणाका असंख्य कुण्ठाहरू पालेर
प्रेमको कविता लेखेको हुँ !
छिमेकीको छानोमा पिसाब फेर्दै-
सदाचारको कविता लेखेको हुँ !
म स्वीकार गर्छु-
स्वार्थको उपल्लो भूभागमा उभिएर
मित्रताको कविता लेखेको हुँ !

पापको पोखरीमा चुर्लुम्म डुब्दै
धर्मको कविता लेखेको हुँ !
पतित विचारको मसीबाट –
नैतिकताको कविता लेखेको हुँ !
अश्लीलताको पराकाष्ठाबाट-
शालीनताको कविता लेखेको हुँ !

म स्वीकार गर्छु-
राँगाको मासु चपाउँदै-
अहिंसाको कविता लेखेको हुँ !
-चुँडालेर फूलका थुँगाहरू
सौन्दर्यको कविता लेखेको हुँ !
– रुखका हाँगाहरू भाँच्दै
– अबोध चराहरू लखेट्दै
प्रकृतिको कविता लेखेको हुँ !
– आत्मरतिको आवेगमा
दर्शनको कविता लेखेको हुँ !
– स्थिर तलाउमा ढुंगा हिर्काएर-
शान्तिको कविता लेखेको हुँ !
म स्वीकार गर्छु-
चिन्तन र/विचारबाट स्खलित भएर-
मैले कविता लेखेको हुँ !

भित्र भित्र विद्वेष र/विभाजनको विउ रोप्दै-
बाहिर बाहिर सामाजिकताको कविता लेखेको हुँ !
म स्वीकार गर्छु-
न्याय/विधान साक्षी राखेर-
मैले अपराधीहरूको पक्षमा कविता लेखेको हुँ !
म स्वीकार गर्छु-
मैले घूस खाएर भ्रष्टाचार विरुद्ध कविता लेखेको हुँ
कमिशन खाएर दलाली विरुद्ध कविता लेखेको हुँ !

कामुक कामुक शब्दहरू प्रयोग गरेर-
अमूर्त अमूर्त शब्दहरू प्रयोग गरेर-
क्लिष्ट क्लिष्ट शब्दहरू प्रयोग गरेर-
नजाने कति वर्षदेखि-
झूट बैमानी र/छलकपटको सहारामा-
कविता लेख्दैछु !
म स्वीकार गर्छु-
मैले विदेशीको हुण्डी खाएर-
देशभक्तिको कविता लेखेको हुँ !

हाल, काठमाडौं