नेपाली हास्यव्यङ्ग्य अनलाइन पत्रिका

तीस बर्षे लुतोले खङ्गरङ्गै बनायो
उठ्नै नसक्ने गरि डङ्गरङ्गै ढलायो
बल्लतल्ल जुर्मुराउदै
सकि नसकि धुर्मुराउदै
छयालीस सालमा अलछिना लुुतो फालेकै हो
लुतोको नाममा कालो मुस्लो बालेकै हो
पुराना लुतुङ्ग्रेका मुर्ति र शालिक ढालेकै हो
त्यहि बर्षदेखि लुतो झन् आङभरि आयो
देखाउनै नमिल्ने गरि जाङभरि आयो
हिँड्नै नमिल्ने गरि टाङभरि आयो
निको भएन लुतो बल्झीबल्झी आयो
वाक्क दिक्क हुनेगरि अल्झीअल्झी आयो

त्यसै भएर फेरि
बैसठ्ठी/त्रिसट्ठी सालमा पनि
लुतो फालेकै हो
लुतोको नाममा टायर बालेकै हो
सडक पुरै गालेकै हो
लुतोका बचे कुचेका अवशेष ढालेकै हो

तर के गर्नु
त्यसै सालदेखि
लुतो झन् झन् खनिएर आयो
सर्वहारी नायक झैँ बनिएर आयो
शरीर पुरै चिलाई चिलाई खायो
रगत र मासु मिलाई मिलाई खायो

जति फाले नि आइरहँदा
कुटुकुटु खाइरहँदा
रगत पसिना चुसेर
भित्रभित्रै खोक्रो बनाइरहँदा
सञ्चो मानेर कतिन्जेल कनाइरहने
सिङ्गो ढुकुटी यसैमा
कतिन्जेल खनाइरहने

त्यसैले आउनोस्
अब लुतोलाई नपालौँ
अगुल्टोहरू बालौँ र
झोसेर यसको मुखमा
घरको धुरी कटाउँदै
सदाको लागि फालौँ
र समृद्धिको दियो बालौँ ।
इति

(लुतो मन्त्र फुक्ने झाँक्री सिस्नुपानी मकवानपुरका मुखिया हुन्)