नेपाली हास्यव्यङ्ग्य अनलाइन पत्रिका

आउँदा सद्देजस्ता देखिन्थे,
जनताका गनगन सुन्दासुन्दा लखतरान् भैसक्यौं
त्यसैले याहाँ आरामसँग रात बिताउँन आको भन्दैथिए,
पार्टीभित्रको झगडा मिलाउँदैमा दिमाग पञ्चर हुन लागिसक्यो
त्यसैले जादूटुनाको रिहर्सल गर्न आको पनि भन्दैथिए ।
तर
साँझ छिप्पिँदै गएपछि ती सबै कुरा बिर्सिएछन् कि कसो हो,
आ–आफै भष्मासुर बन्दैगए ।

यतिउति भन्ने ख्यालै गर्न भुलेछन् क्यार,
देखे भेटेजति साँप्रा फिला चपाएर गए,
यो ऊ ब्राण्ड भन्ने पनि चिनेनछन् विचरा !
भएभरको झोल पदार्थ सुमर्क्याएर गए
पिउँदापिउँदै शौचालय छिर्नै नसक्नेगरी बेहोस भएछन् कि कसो हो ?
विस्तराकै भित्तो तुर्क्याएर गए,
रोगी ज्यानले कन्टिनेन्टलको गरिष्ठ भोजन पो कति थेगोस् र !
सुतेको डनलपमाथि नै गोब्र्याएर गए ।

बिहान बिउँझिदा अलि लाज भएछ कि कसो हो !
छोपछाप पार्न त्यही तन्दा दोव्य्राएर गए,
सरसफाइ –कामदार मरिगएछन् घीनले
भन्दैथिए– अनि केको समृद्ध नेपाल बनाउँछन् यिनले ?

काठमाडौंं
९८४१६४७१८९