नेपाली हास्यव्यङ्ग्य अनलाइन पत्रिका

उर्लीउर्लीकन धरहरा गर्छ यो प्रश्न यौटा
कुर्ली घण्टाघर अब बित्यो भन्छ ठोकेर घण्टा ।
मानी सुर्ता अधिक वयको पोखरी झन् करायो
के भो यस्तो भन न किन यो काठमाडौँ गनायो ? ।।१।।

लागे द्यौताहरू पनि यहाँ स्म्याक तानेर डुल्न
लागे आफैं अब गुरुहरू धर्मको मर्म तोड्न ।
हाम्रा देवस्थलहरू सबै कोपरा झैँ गरायो
थुप्री मैला भुवनभरका काठमाडौँ गनायो ।।२।।

खोल्छिन् बाला जब प्रगतिका मूल सम्झेर धारा
प्यूँछन् प्यारा युवक हँसिला देशका नैन तारा ।
धारैपिच्छे तर किन यहाँ हुस्स रक्सी बगायो
हस्की हस्की शिव ! शिव ! कठै ! काठमाडौँ गनायो ।।३।।

मन्त्रै कालो जपनियमको न्याय कानून कालो
तन्त्रै कालो जनगणमहाँ व्याप्त आचार कालो ।
धन्दा कालो धन-मन तथा धर्म कालो गरायो
कालै हग्दै दिनदिन कठै ! काठमाडौँ गनायो ।।४।।

बेची आमासरि निजकला संस्कृति भ्रष्ट पार्‍यो
नेपालीको छवि र नियती खाल थापेर हार्‍यो ।
मर्यादा नै बसनरहिता द्रौपदी झैँ गरायो
के भो यस्तो भन न किन यो काठमाडौँ गनायो ? ।।५।।

वि.सं २०४५/४/२६, लालसलाममा सङ्ग्रहित