नेपाली हास्यव्यङ्ग्य अनलाइन पत्रिका

जता जेसुकै होस्- मेरो के दोष ?

मैले खान- लाउन पाउनु पर्छ, पाएको छु, भैगो !
मैले उचाल्न- पछार्न पाएको छु, भैगो !
मैले उभ्याउन- ढाल्न पाएको छु, भैगो !
सबै बाङ्गा, म पनि बाङ्गो
सबै नाङ्गा, म पनि नाङ्गो, भैगो !
ती सबै छन् मेरा दृष्टिकोणमा उल्लु
रगत- पसिना बगाएर
देश बनाउनेहरू
अहिले मेरा प्रिय पात्र छन्
झुप्राको खरानीमाथि
महल ठड्याउनेहरू
मैले खान- लाउन पाउनु पर्छ पाएको छु, भैगो !
मैले उचाल्न- पछार्न पाएको छु, भैगो !
मैले के नै गरेको छु गल्ती ?
केको लागि, किन गर्ने केही अफसोच ?
जता जेसुकै होस्
म त चुपचाप शान्त भै
सबैथोक सहेर बसेको छु ।
हेर्नु पर्ने- नहेर्नु पर्ने सबै हेरेर बसेको छु
ल तपाईं नै भन्नुस्- यस्तोमा मेरो के दोष ?

०००
विराटनगर