नेपाली हास्यव्यङ्ग्य अनलाइन पत्रिका

साँच्चै कति अनौठो भोक
न दाल भातले मेटिने
न त मकै भटमासले ।
अरुचि छदै छैन रुचि मात्र हुन्छ
हात खाली हुन्नन् मुख चलिरहन्छ
तैपनि खै मन पेट भरिन्न
भोक जागिरहन्छ ।

प्यास पनि उत्तिकै लाग्छ
प्यास लाग्दा पानी होइन
सानी खोजी गरिन्छ
आलो रगत पनि पिएको देखिन्थ्यो
सारा जगत पनि लिएको हो ।
भर्खर ढालेको मासु मनपराउँछन्
खोरबाट थुत्न आफ्नालाई अह्राउँछन्
यिनको छनौट अनौठो छ ।

तोकिएको दिन र स्थानमा
अनगिन्ती निरिहहरू र
केही सिल्ली हरू जम्मा गरिन्छन्
रगत र मासु भन्दा अघि
यिनीहरू भोटको शिकार गर्छन्
जसले मन र मस्तिष्कमा उर्जा थपिन्छ
जोश र जाँगर थपिदिन्छ ।

जब भोटको भोजन सकिन्छ
भोकको रुप परिवर्तन हुन्छ
भोक उग्र रुपमा बढ्दै जान्छ ।
नोट र सुनको सुगन्ध
पद र शक्तिको उन्माद
मान र प्रतिष्ठाको आडम्बरले
भोक झनै जाग्दै जान्छ ।

भोक तिव्र गतिमा बढिरहँदा
काठको कुर्सी मन पर्दैन
हड्डीको कुर्सी निर्माण गरिन्छ ।
हात समाउने र ढाड अड्याउने भाग
मासुका डल्ला र रगतले पोतिएको हुन्छ ।
त्यसपछि असामान्य रूपमा
पेट र वाणी बढ्दै जान्छ
दौराको फेरले नछोपिने गरि
कसैको चोर औंलाले नरोकिने गरि ।

भोक थामी सक्नु हुँदैन
हरेक पल बढिरहेको हुन्छ
अब भने भोक निकै उचाईमा पुग्छ
यिनीहरूले
सामुन्ने परेका सबै वस्तुहरू
क्वाप्प निल्न सक्छन्,
भिटामिनको क्याप्सुल निले जस्तै
सुगरका गोली निले जस्तै ।

अब यिनको भोक बीसको उन्नाइस हुन्छ
तर यो अनौठो भोक
शान्त भने कहिले पनि हुँदैन ।

०००
चितवन