नेपाली हास्यव्यङ्ग्य अनलाइन पत्रिका

१.
‘समानुपातिक’ को तर्कशास्त्र

धरानको चारकोसे झाडीमा
भेट्यो एक्कासी एउटा राक्षस
मलाई देख्दै चिच्यायो,
ए मानिस ! सावधान !
म तिमीलाई खान्छु ।

मैले आफ्नो बुद्धि लाउन भ्याएँ
र उसका सामु यौटा शर्त तेस्र्याएँ ।
पहिला यो ‘समानुपातिक’को
अर्थ के हुन्छ मलाई बुझाऊ
फेरि जसरी जताबाट तिम्रो इच्छा लाग्छ
काँक्रो खाए जस्तै मलाई खाऊ ।

‘समानुपातिक’को नाउँ सुन्दै
राक्षस फस्यो मेरो छलमा-
यस्तो पर्‍यो अलमलमा
अहिलेसम्म सोच्दै
बसिराखेको छ त्यहीं जङ्गलमा ।

म बल्ल जोगिन भ्याएँ बुद्धिबलमा,
अहिले फोटो खिचाउँदै छु
इटहरीको भाटभटेनी सुपर मलमा ।

२
बाबु लुटिन्छ- छोरा कुटिन्छ

शिक्षकले सोधे-
यस्तो कुन ठाउँ हो जहाँ,
‘बाबु लुटिन्छ- छोरा कुटिन्छ’

उसले यताउता केही न सोची
झट्ट भनिदियो ‘स्कूल’ ।
भयो रेस्टिकेट- गर्‍यो ठूलो भूल ।

०००
विराटनगर