नेपाली हास्यव्यङ्ग्य अनलाइन पत्रिका

१.
बपौती

नेता पहिले पनि छानिन्थे,
अहिले पनि छानिन्छन्,
फरक यति मात्र छ कि,
पहिले नेता छानिनु,
हुन्थ्यो एक चुनौती,
अब पुग्छन् पदमा चलाउँदै
संचित शक्तिको करौंती –
जस्तै बपौती ।

२.
आलोपालो

यसले उसलाई उचाल्यो
उसले यसलाई उचाल्यो
जोड दिएर यताको गुटमा हाल्यो
घटाउ गरेर उताको गुटबाट निकाल्यो
छुट्याउनै गाह्रो भयो
को छ हिंग- को छ हिंगको टालो ?
अब थाहा पाउन गरिँदैछ,
सत्ताप्रपञ्चको जादु कालो ।
वाह क्या गजब रहेछ यो
शक्तिपरीक्षणको फर्मुला
“आलोपालो ।”

०००
विराटनगर