नेपाली हास्यव्यङ्ग्य अनलाइन पत्रिका

यौटा चिप्लिएर लड्यो अर्को उछिटिएर पर्‍यो
एउटा मावलीतिरको अर्को ससुरालीको ।
यता काट्यो ऊ रिसाउने उता थप्यो ऊ झर्कने
यो समानुपातिक भनेकै बाठो भान्से अघाउने ।।

सिद्धान्त सिका लगाई खरिद बिक्री वितरण
पशु झैं किनिनु पर्ने कस्तो छ बिडम्बना ।
मोलतोल बढाबढ लिलाम परि छिरेका
संसदमा निदाइ सधैं जनता यिनले पिरेका ।।

कसरी रोकिएला यस्तो स्वार्थी यो वितरण
यौटालाई फकाउन लाग्यो अर्को फ्यानिन्छ झन् ।
श्रीमती राख्नै पर्‍यो आसेपासे नातेदार
ड्राइभरदेखि पालेसम्म परे आफ्नै सेवक ।।

मौकामा चौका नहाने कमाउने कसो गरी
घुम्न रहर छ विदेश लिई आफ्नै श्रीमती ।
पार्टीको सिद्धान्तमा ठेकेदारको डोजर चल्यो
आदर्श बिर्सेर कार्यकर्ता बहुलठ्ठी बन्न थाल्यो ।।

निमुखा भोकै मर्छ भान्से अगतिलो परे
देश कङ्गाल नबनोस् यिनको रजगजले ।
बोल्ने मात्र धेरै छन् काम गर्ने कोही हैन
यिनका चिल्ला भाषणले पेट हाम्रो अघाउँदैन ।।

०००
ओखलढुङ्गा

९८४३०५४१६१