नेपाली हास्यव्यङ्ग्य अनलाइन पत्रिका

मैले तिमीलाई
अनाहकमा कहिले घोचेको छु र ?
मैले तिमीलाई बिनासित्तै
तिम्रो खुसी कहिले खोसेको छु र ?
मैले तिम्रा लक्षहरूमा
कहिले रोकेको छु र ?
तिमीले मेरो झाङहरूमा
कुनै प्रवाह नगरी
आफ्नो खुसी खोजिरहँदा
तिमीले मेरो मौनतामाथि
निरन्तर प्रहार गरिरहँदा
तिमीले मेरा आस्थामाथि
निरन्तर आँखा गाडिरहँदा
तिम्रा ती काला नङ्ग्राहरूमा
चुपचाप मेरैअघि मेरा फूलहरू
बलात्कृत भएको म कहाँ देख्न सक्छु र ?
तिम्रा स्वार्थी हतियारहरूले
मेरा झाङ्हरू रेटिरेटी हत्या भएको
म कसरी सहन सक्छु र ?
तिमीले
मेरा फूलहरूको
जताभावी अश्मिता लुटिरहँदा
यी काँडाहरूको कुनै मूल्य छैन भनी
तिमीले मेरो मानमर्दन गरिरहँदा
अनि मेरा हाँगाहरू लतारिरहँदा
म रमिते बनेर टुलुटुलु हेरिरहन कहाँ सक्छु र ?
म तिम्रो प्रतिकार नगरिरहन
म कहाँ सक्छु र ?
तिम्रोअघि मेरो स्वाभिमान
आत्मसमर्पण गरिरहन कहाँ सक्छु र ?
त्यसैले,
मेरो मौनता भङ्ग गरिरहने
तिम्रो एकलवादी सोच बिरुद्ध
मेरो अस्तित्व रक्षाका लागि
अझ तीखो भएर
तिम्रो आक्रमण अनि अतिक्रमण बिरुद्ध
म आक्रोश पोखिरहन्छु
अवरोध गरिरहन्छु, बिद्रोह गरिरहन्छु
एक्लो बृहस्पति नै सही
मेरा फूलहरूको झाङभित्र
तिम्रो प्रभुत्ववाद विरुद्ध
बस् … म खबरदारी गरिरहने छु !!

०००

काठमाडाैं