नेपाली हास्यव्यङ्ग्य अनलाइन पत्रिका

प्रेम राई परीक्षित :

कमरेड !
आज म रेड उडेर
अलि कम रेड भएको छु
अलिअलि रातो
अलिअलि धसिङ्गरे
अनि धेरै कसिङ्गरे भएको छु
कमरेड
आजकल म निठा रातो रङ हराएर
कम रेड
यानेकी रातो कम भएको छु
बढि अरु नै भएको छु ।

कमरेड !
आजकल म बदलिएर
अलि रिमिक्स भएको छु
कोटमा पाइँजामा लगाएर
राम्रैसित झिमिक्स भएको छु
कमिसन र भ्रष्टाचारमा
फ्युजन भएको छु
कनसिरी कन्याउँदै
बाहिर टाइफिटिङ भित्र जुम्राको मिटिङ
म आफैलाई नचिनेर कन्फ्युजन भएको छु
गन्तव्य थाहा नभएर
आज आफै इल्युजन भएको छु

कमरेड !
आजकल
म भित्र रेड नखोज्नु
लाल सलामको लाल नखोज्नु
समय परिवर्तनशील छ
म पनि परिवर्तन भएकै छु
त्यसैले, कमरेड !
मसँग नरिसाउनु
म रेड हराएर
अलिअली धसिङ्गरे भएको छु
म निष्ठा हराएर
धेरै कसिङ्गरे भएको छु
म लाल सलाम हराएर
आजकल म
दलाल सलाम भएको छु ।

कमरेड !
कमनिष्ट भए पनि
म भित्र निष्ठा नखोज्नु
किनकी
म निष्ठा हराएर
आजकल कम निष्ठ भएको छु
मलाई कम्युनिष्ट हैन
कम निष्ट भन्नू
मलाई लाल सलाम हैन
दलाल सलाम भन्नु

कमरेड !
सर्वहारा होइन म
म भित्र हराभरा खोज्नु
किनकि
आजकल म
गरिब निमोठेर सरीफ भएको छु
गरिबको होइन
कमिसनको करिब भएको छु
त्यसैले, कम्रेड
म भित्र कमनिष्ट नखोज्नु
कम निष्ठा खोज्नु

कमरेड
म भित्र माओ नखोज्नु
मात्र कमाओ खोज्नु
म भित्र
लेनिन अनि कार्ल मार्क्स नखोज्नु
बरू मेरो अनुहारमा
कालो माक्स खोज्नु
कम्रेड म भित्र कमनिष्ट नखोज्नु
कम निष्ठा खोज्नु

जे भन्नुहोस्
शिरोधार्य छ मलाई
समयको माग हो
तपाईं घोडा
र म लगाम भएको छु
सबैलाई उछिन्दै
आज असली बाम भएको छु
कमरेड
तपाईं भिडमा हराउनुमा
मेरो के दोष छ र ?
सबैको मुखमा झुन्डिने
नाम होस या दुर्नाम
भ्रष्टाचारको गतिलो सर्वनाम भएको छु !!

त्यसैले
कम्रेड, म भित्र
अब कमनिष्ट नखोज्नु
कम निष्ठा खोज्नु
म भित्र माओ हैन कमाओ खोज्नु
कार्ल मार्क्स हैन
अनुहार नचिनिने कालो मार्क्स खोज्नु
लाल सलाम हैन
दलाल सलाम खोज्नु… !

०००
काठमाडाैं