नेपाली हास्यव्यङ्ग्य अनलाइन पत्रिका

जतिसुकै क्रान्तिकारी होस्
राज्य विप्लवको नारा लाओस्
गुरिल्ला युद्ध चलाओस्
विद्रोहको आगो ओकलोस्
किन्चित कसैले डराउँनु पर्दैन,
उसलाई एक पटक सत्ता चखाएपछि
ऊ आफैँ ठिक हुनेछ ।
किनकि,
उसको मथिङ्गल हल्लिनेछ
दिमाग उल्टिनेछ
चेत शून्य हुनेछ,
तर ऊ आफू सही भएझैं गरी
सत्ता सत्ता भन्दै रुनेछ ।

सत्ताको नस स्वादिलो
सत्ताको लत गतिलो
सत्ताको मेस पोसिलो
सत्ताको भेष रवाफिलो
पोसिलो खाना
रवाफिलो नाना
पहरे र चप्रासीको गाना
हुक्के र चिलिमेको बजाना
यति भएपछि क्रान्तिकारीले
आफूलाई सर्वश्रेष्ठ ठान्नेछ ।
क्रान्ति पूरा भएको मान्नेछ
यो देसको माओ, लेनिन
र मार्क्समा आफूलाई गन्नेछ ॥

सत्ता चाखेको क्रान्तिकारी
चाहे जङ्ग होस् वा चन्न,
एकाएक संसार सोझिएको देख्नेछन् ।

समाजका
नाजायज कुराहरू जायज
गलत कुराहरू ठिक
खराव कुराहरू सही
असमान कुराहरू समान
फटाहा सामन्त र दलाल नोकरसाहहरू
क्रान्तिकारी र दिन दुखीका मित्रु देख्नेछ ।
किनकि क्रान्तिकारी आफैँ बिग्रिएर
पत्रु भै सकेको हुन्छ ।

०००
काठमाडौं