नेपाली हास्यव्यङ्ग्य अनलाइन पत्रिका

कहिले हामी उता चिप्लन्छौँ
कहिले हामी यता चिप्लन्छौँ
नाथे आफैंले फ्यालेको
केराको बोक्रामा
चिप्लन्छौँ
घरभित्र पोखिएको पानीले
उत्तानो बनाउँछ हामीलाई
खुट्टाको जुत्ताले उछिट्याएर
खाल्डोमा जाकेको छ कतिलाई
मुखभित्रको जिभ्रोले चिप्ल्याउँदा
बद्नाम बनाएको छ कतिलाई
यहाँ दाजुले भाइलाई
छोराले बाउलाई
श्रीमतीले श्रीमानलाई
व्यापारीले ग्राहकलाई
पुरेतले जजमानलाई
सरकारले जनतालाई
चिप्ल्याउँदा केही भएको छैन
जाबो केराको बोक्रामा चिप्लिएर
केको रोइलो गर्नु हुन्छ महोदय
भ्रष्टाचारले देश चिप्ल्यायो
अन्धविश्वासले समाज चिप्ल्यायो
बेरोजगारीले युवा चिप्ल्यायो
धन सम्पत्तिले
अपनत्व चिप्ल्यायो
बिचौलियाले
सरकार चिप्ल्यायो
अझ कति चिप्ल्याउने
योजना बन्दै छ
जाबो केराको बोक्रामा चिप्लिएर
केको रोइलो गर्नुहुन्छ महोदय !?

०००
(९८४३०५४१६१)
ओखलढुङ्गा