नेपाली हास्यव्यङ्ग्य अनलाइन पत्रिका

कोसेली नलिई नआउनु तिमी यो देशको माझमा
दुःखीका रसिला दुई नयनमा आभा भरी साँझमा
आयो वर्ष नयाँ घुमेर घरमा रित्तो भकारी सँगै
भारी छैन कतै बसन्त धनको आकाश धर्ती सँगै ।

खै के के छन योजना समूहमा यो वर्ष बाँड्ने कुरा
आशा मात्र छ देख्न भोग्न सपना धर्ती भरी माकुरा
रित्तो हात लिएर आउँछ सधैँ फर्केर हेर्दै घरी
भो भो भो अब भो पुगो मनभरी यो वर्ष यस्तै गरी ।

पायौँ लौ शुभकामना सबजना भै मख्ख यो वर्षमा
पायौँ लौ कति कष्ट जीवन भरी नौलो नयाँ हर्षमा
सत्तामा दस टाउके पुगिगए श्रीपेच भिर्ने गरी
रैतीको मनभित्र बास नहुने हिड्छौ तिमी के गरी ।

घुम्दै वर्ष भरी बसन्त वयमा हिड्ने नयाँ वर्ष यो
रित्तो भो शुभकामना मुलुकमा देखिन्न खै हर्ष यो
यस्ता वर्ष नयाँ युगौँ समयमा बेहाल आए गए
दुःखीका घरभित्र छैन रमिता उस्तै छ वर्षौ भए ।

आशैआश छ मात्र जीवनभरी पाइन्न नौलो कुरा
बोकाको बलि झैँ बनाइ रणमा पेल्दै छ रैती पुरा
मान्छे छैन खुशी कतै भुवनमा नौलो नयाँ वर्षमा
वर्षौदेखि सहेर कष्ट विपना नाँचेन कोही हर्षमा ।

०००
गाईघाट, उदयपुर