नेपाली हास्यव्यङ्ग्य अनलाइन पत्रिका

हिजोको सहयोद्धा साथी
सत्ताधारी आज कमाल !
तेरो विगत दुःस्वप्नझैँ
आज भइस् क्या मालामाल !

ईर्ष्या गर्ने गर्दैरहन्छन्
भोका-नाङ्गा सब बेहाल
रिसले मर्ने मर्दै गर्छन्
जित्नेहरूकै हो नेपाल !

भयो पुर्पुरोमा जनको
बाढी-पहिरो औ अनिकाल
केही तैंले पनि दे भाइ
फैला पूरै भाषण-जाल !

गुलियो चट्ट चटाउँदै
ख्वाउनुपर्छ मीठो माल
मासु-चोक्टा नहोस् न बरु
हाडका टुक्राहरू नै फाल् !

मीठा सपना बाँड्दै गर्नू
कोही गर्छ भने बबाल
सिक्री खोलिदिउँला भाइ
टोक्ने विदेशी कुकुर पाल् !

सुक्छ सुकोस् यो मेची-काली
सगरमाथा होस् पाताल
आलोचना, दोषारोपण
मात्र शत्रुहरूको चाल !

विपक्षीलाई देखाउँला
बन् तँ हाम्रो बलियो ढाल
चुनाब हामी जिताउँला
चाहिए खै बन्दुक-नाल !

ढुकुटी सबै रित्याएछस्
हाम्रो झोलीभित्र पनि हाल्
अनि हेर्नू तँ हाम्रो शक्ति
बनाउँला यो धर्ती लाल !
सोझो गरी घिउ निस्कन्न
पार्नै पर्दछ बाङ्गो चाल

ढुक्कैसँग भन् तेरो सत्ता
नेपालकै स्वर्णिम काल !
श्वान-हनुमान्बाटै मिल्ने
सत्ताको यो स्वाद कमाल

गिदी नदुखा स्वाँठे ‘पट्टु’
राजनीति इन्द्रकै जाल !

०००
दाङ