नेपाली हास्यव्यङ्ग्य अनलाइन पत्रिका

उम्किन्छ माछो जसरी समाऊँ
भन्छन् म प्यारी कसरी लुकाऊँ
खाए अहो ! कागज त्यो चपाई
हो दोष मेरो भन के छ भाइ ? ॥

छोरा सँगै देवर बाबू मेरो
छोडिन्छ रे भाउजुको बचेरो
बद्लेछ बोली रुपियाँ छरेर
चोखिन्छु भन्छन् झगडा गरेर ॥

कस्का बचेरा पहिचान छैन
नेपाल बस्ने अनुदान छैन
हुन्छन् प्रवासी मलिनो मुहार
माग्दैछ धर्ती जनको गुहार ॥

ए देशबासी अधिकार सोचौँ
सत्ता र भत्ता सबबाट खोसौं
ठूलो र सानो छविबाट हुन्छ
चित्कार तिम्रो कविले त सुन्छ ॥

सन्तान बेच्दै ढुकुटी भरेछन्
दुष्टात्म मामा घरमा सरेछन्
दोषेर अर्को किन जोखिने झन्
लाजै हँसाई अब चोखिने छन् ॥

०००
सानोठिमी, भक्तपुर