नेपाली हास्यव्यङ्ग्य अनलाइन पत्रिका

रमेश समर्थन :

यो मेरो देश हो,
हो, यो मेरै देश हो,
भनिसकें नि
मेरै देश हो यो,
किनभने
संयोगले नै सही,
म यहीँ जन्मेको हुँ ।

म नजन्मँदै मलाई
बिक्रीमा राखेको थियो मेरो देशले
गोर्खा फौजको नाममा
भारतमा होस् या बेलायतमा ।
फौजमा नबिक्नेहरू
गल्लीमा बेचियौं
होटेल, सरकस र कोठीमा बेचियौं
तर बेचियौं ।

बेचियौं किनभने बेचिनु नै
हाम्रो राष्ट्रिय पहिचान हो
नेपाली हुनुको सान हो ।
बडे महाराजाले बेचे
छोटे महाराजाले बेचे
टोले महाराजाले बेचे
झोले महाराजाले बेचे
सिपाही बनाएर बेचे
दरबान बनाएर बेचे
कान्छा बनाएर बेचे
कान्छी बनाएर बेचे
गोर्खा बनाएर बेचे
बहादुर बनाएर बेचे
तर बेचे ।

हामी बेचियौं
बेचिइरह्यौं
अब व्यापारको बजार बदलिएको छ
कोही शारीरिक कामदार बनेर
कोही बौद्धिक दामदार बनेर
कोही नैतिक बेइमान बनेर
बेचिँदै छौं
कोही खोरमा पालिन त
कोही बाकसमा फालिन
तर बेचिँदै छौं ।

आज त हदै भयो
बेचिँदा पनि मैले म म हुँ भनेर बेचिइन पाइनँ
मेरो जन्मसिद्ध परिचय नै नामेट पारेर बेचे
उफ् !
बेचिन पनि बाख्राको पाठाले
सुँगुरको पाठो बन्नुपर्ने ?

०००
२०८०/२/१४
रुपन्देही