नेपाली हास्यव्यङ्ग्य अनलाइन पत्रिका

शिवप्रसाद जैशी :

मिल्दै मिल्दैन
भन्न मिल्दैन
हामीलाई पशु !

विचार शून्य
विचारको सौदा
स्वविचारको भेटी दान गरेर
भक्ति भाव राख्दैमा मिल्छ र भन्न पशु ?

दिव्य दृष्टिको बर्षाका लागि
प्रभुको चरणमा आफ्नो विचार
टक्र्याएको पो हो
धनधान्य गृह, वैभव र श्रीबृद्धिका लागि
विचारको भर्‍याङ् चढ्दा चढ्दै

उपल्ला खुड्किलोमा पुग्नु पर्दा
परलागेमा पुग्ने बेला भएका
शरीर र दिमाग चल्न थोरै बाँकी रहेका
प्रभुका पाउमा शिर राखेर
सिद्धान्त गोठमा बाँधेर
आस्थालाई कन्दनीमा गाँठो पारेर
लगौंटीभित्र बेरेर
अनास्थारूपी गजुरमा चढाउँदा कसरी पशु ?

विचार धरौटी राख्दा
चार खुट्टा आए ?
सिङ उम्रे ?
पखेटा लागे ?
पुच्छर निस्क्यो ?
जुरो पलायो ?
फोहर उधिन्न थुतुनु चल्यो ?
जिब्रोले लपकलपक चाट्यो ?
अनि कसरी पशु ?

तिर्खा मेटन् सम्पादित कर्मलाई
थोरै भौतिक शान्तिका लागि
मष्तिष्क दान गर्ने धर्मलाई
मन बसमा पार्न सक्ने स्वविवेकी मर्मलाई
तथास्तु प्राप्त गर्न गरिएको श्रमलाई
मिल्छ भन्न पशु ?

०००
कैलाली, हाल- काठमाडौं