नेपाली हास्यव्यङ्ग्य अनलाइन पत्रिका

राजेन्द्र कार्की :

गुरु भन्छन्
बोर्डमा जोताउँछन्
रोडमा नचाउँछन्
नम्बर नदिए ठटाउँछन्
दिएपछि कताकता भज्याउँछन् ।

गुरु पूर्णिममा
उपद्रैसित मान्छन्
उछिन पाछिन गर्दै
बानेर बिरालो थाममा
प्रशंसाका पिण्ड चढाउँछन्
बाँकी घृणाका लिण्ड लगाउँछन् ।

श्रद्धाको बाढी उर्लेको देखेर
हर्ष भावले विह्वल हुँदै गुरु
न सक्छन् रुन धुरुधुरु
न धन्य भन्न सक्छन् खुरुखुरु
फोहरले ढाकेका बाक्ला चश्मामा
बूढा बा अनि ती बूढा मास्टर
झनै दिग्भ्रमित हुँदै द्विविधामा छन्
जिन्दगी भरी जोतिएको गुरु हुँ कि गोरु ।

माने पनि नमाने पनि
चिलाउनेको बोक्रा झैं ताछे पनि
हड्डीखुड्डी भाँचे पनि
छुरा र भालाले घोंचे पनि
आँखा देखाउदा आँखै निकाले पनि
जस्तोसुकै रङ्ग देखे पनि
गुरु र गोरु जे जे भए पनि
टालिएका आँखा खोलेकै हो !

०००
क्यानडा