नेपाली हास्यव्यङ्ग्य अनलाइन पत्रिका

लक्ष्मण नेवटिया :

हरि हरि ! कचहरी पुग्यो
शिवहरीको जलहरी

कुरा फेरिन्छ घरीघरी
हल्ला चलेर थरीथरी ।
चलेको देख्दा दोहोरी
उदास मेरी मनकी चरी ।
बमबम बमबम बमलहरी
हरि हरि ! कचहरी पुग्यो
शिवहरीको जलहरी ॥

सम्मान जोगाउने के गरी
जो आर्जन गरेको मरीमरी
आँखामा आँसु गहभरी ।
के सुन्नु पर्‍यो दिनभरी ?
बमबम बमबम बमलहरी
हरि हरि ! कचहरी पुग्यो
शिवहरीको जलहरी ॥

थप देख्नु नपरोस् यस्ता झाँकी
धुवाँ उठ्यो निभाउन किन बाँकी ?
विश्वन्यायदाताकै घरमा मनपरी
सत्यनिरूपण गरिदेऊ हे महेश्वरी !

बमबम बमबम बमलहरी
हरि हरि ! कचहरी पुग्यो
शिवहरीको जलहरी ॥

०००
विराटनगर