नेपाली हास्यव्यङ्ग्य अनलाइन पत्रिका

इन्दिरा प्रयास

भाषाको महिमा बुझेर उनले लेखेर रामायण
तिम्रा चिन्तन नै रहेछ गतिलो आदर्श नारायण
लेख्थे काव्य सधैं अनन्त रहने मान्छे तपस्वी भनौँ
हामी भानुसमान काव्यपथमा लम्की यशस्वी बनौं !१!

घाँसीको उपदेश चम्कन गयो सद्कार्य तिम्रो थियो
घन्के थे कविता जसै अवनिका बालेर शिक्षा दियो
नेपाली पथमा डुली सफरमा साहित्य प्रेमी गनौं
हामी भानुसमान काव्यपथमा लम्की यशस्वी बनौं !२!

त्यो प्रश्नोत्तर काव्य मात्र नभई ज्ञानेन्द्र खोल्ने थियो
कालो अक्षरको महत्त्व यसरी बुझ्दा बनेछौ मियो
आस्था हो गहना म भन्छु कृतिमा उत्प्रेरणाको अनौं
हामी भानुसमान काव्यपथमा लम्की यशस्वी बनौं !३!

रम्घाका पहरा चुँदी बगरमा साहित्य वास्ना छरी
भो रामायण कण्ठ त्यो बखतमा घन्केछ पाखा भरी
नेपाली मनमा सुवास जसरी डुल्ने सुबाटो खनौं
हामी भानुसमान काव्यपथमा लम्की यशस्वी बनौं !४!

छन् मान्छे नवमा पुगी शिखरमा पूजा गरी ज्ञानका
आभा भानु तिमी टलक्क गिरिका हौ ज्योति सम्मानका
बोल्नेका कनिका बिकेछ सहजै साहित्य यात्रा चुनौं
हामी भानुसमान काव्यपथमा लम्की यशस्वी बनौं !५!

०००
सानोठिमी, भक्तपुर