नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

नेपालमा असारमा खेतमा धान रोपिदैन !
तर विकास रोपिन्छ !
असारमा खेतमा धान रोपेर
मङ्सीरमा किसानको भकारी भरिनु पर्ने हो
तर नेपालमा
असारमा विकास रोपेर
नेताज्यूले वर्षभरि नै वैङ्क भर्नु हुन्छ ।

त्यसैले विकासप्रेमी नेताज्यू,
असारमा खेतमा धान होइन्
विकास रोप्न मन पराउनु हुन्छ !

असरमा खेत रोप्न
किसानको खेतमा पानीको कुलो चाहिन्छ !
मल र बिउ चाहिन्छ
श्रम पोख्ने पाखुरी चाहिन्छ !
तर नेताज्यूलाई,
असारमा विकास रोप्न
न बिउ चाहिन्छ
न मल चाहिन्छ
न पानी कुलाको दरकार पर्छ !
न पसिना बगाउने पाखुराको आवश्यकता पर्छ
सिर्फ सरकारी योजना पुस्तिकामा
विकास योजनाका नक्सा कोरे पुग्छ
बही खातामा
हिसाब किताब मिलाए हुन्छ !

त्यसले त नेताज्यू,
योजना आयोगको रातो पुस्तिकामा
गोरू नारेर खेत जोत्नु हुन्छ र
धान रोप्नु हुन्छ ।
तै रातो पुस्तिकामा
मल किन्नु हुन्छ र छर्नु हुन्छ ।
तै रातो पुस्तिकामा
देशलाई आत्म निर्भर बनाउन,
श्रम पोख्नु हुन्छ,
विकासको मूल फुटाउनु हुन्छ !

०००
गोरखा