नेपाली हास्यव्यङ्ग्य अनलाइन पत्रिका

रामशरण न्यौपाने :

आफ्ना स्रोत गुमाउने सब ठुला उद्योग पार्ने खती
गर्ने हेय सपूत यो मुलुकका मान्ने विदेशी पति
पार्ने खाडल भित्र देश जनता राख्ने पुजी तस्कर
क्या राम्रो गणतन्त्र यो मुलुकमा राजा हुने लस्कर ॥१

ओढे मात्र नि खास खोल दलको अन्याय माफी हुने
खल्तीभित्र छ न्याय मुर्छित जहाँ देखिन्न कोही छुने
नेता कानुन माथि केस सबमा चोखो हुने जे गर
क्या राम्रो गणतन्त्र यो मुलुकमा राजा हुने लस्कर ॥२

नेताका मतियार मात्र पदमा पुग्ने जहाँ जो जति
मान्छे दक्ष सुयोग्यको मुलुकमा राखिन्न लेखा रती
नेपाली जति धीर वीर सब नै लाग्छन् किनारा पर
क्या राम्रो गणतन्त्र यो मुलुकमा राजा हुने लस्कर ॥३

नेताको सुविधा बढाउन यहाँ बन्छन् ठुला कानुन
नेताकै परिवारले बेच्छ तनता व्यापार गर्छन् सुन
आँखा कानुनको गिराउन यिनै ताकेर हान्छन् शर
क्या राम्रो गणतन्त्र यो मुलुकमा राजा हुने लस्कर ॥४

मेलो केवल लूटको र गुटको हाबी भयो देशमा
आए रावण घुस्न मान पदमा श्रीरामको भेषमा
गर्ने दोहन देश साथ जनता अन्यायले बर्बर
क्या राम्रो गणतन्त्र यो मुलुकमा राजा हुने लस्कर ॥५

०००
भक्तपुर