नेपाली हास्यव्यङ्ग्य अनलाइन पत्रिका

भोलानाथ सुवेदी :

सरकार गयो विदेशमा राँगा भैंसी किन्न
कर्मचारी सडकमा छैन बाटो हिड्न ।
मँहगीले चुलो निभ्यो खाली पेट भयो
यो देशमा सरकार छ कि बसाइँ सरी हिँड्यो ॥

महिनैपिच्छे मन्त्री हुन तयार छन् कति
जनताहरू भन्न थाले संघीयता खराबी ।
घरैपिच्छे मन्त्री हुन आउँछ क्यारे पालो
दौरासुरुवाल सिलाउँदा हुन्छ होला भलो ॥

बारी बाँझै खेत बाँझै कुर्सीमा छ आसन
विदेशबाट आउँछ बिहानबेलुकाको रासन ।
नेपालको स्रोत साधन विनाश गरि सक्ने
विदेशबाट ल्याउन भने किन कम्मर कस्ने ॥

राम्रो थिति पहिलेदेखि पुर्खाले यहाँ ल्याए
स्वर्ग जस्तो देश अहिले लथालिङ्ग बनाए ।
कसले थाम्छ कसले हाक्छ यो देशको मियो
यो देशमा सरकार छ कि बसाइँ सरी हिँड्यो ॥

०००
(९८४३०५४१६१)