नेपाली हास्यव्यङ्ग्य अनलाइन पत्रिका

हेमराज पन्त :

यी सञ्जाल भरेर तस्बिर बसे सौन्दर्य तिम्रो बनी ।
यस्तो नक्कल चालको चपलता चाञ्चल्य भाका धनी ॥
कस्तो दृश्य अचम्मको मुलुकमा आफ्ना विराना हुँदा ।
सारा लास लुटी बसे महलमा यी दुष्ट आँखा रुँदा ॥

तिम्रो त्यो मन चञ्चले मगजको अग्लो सिरानी बरा ।
माया, भाव सदैव मुर्छित भयो देखिन्छ बाँझो गरा ॥
कोही रुन्छ अनाथ झैँ मुलुकमा हाँसेर बस्थे कुनै ।
छोपे जाल नचाउँदै दनुजले पापी र जाली उनै ॥

भोकाको भर हुन्छ भन्छ दुनियाँ भित्ता र छानो कस ।
खोज्छौ सत्य सधैं लुकाउन तिमी सानो दुलामा पस ॥
आँखा तर्छ तरक्क तर्क नहुँदा भाषा बिरामी हुँदा ।
तिम्रो लोभ र लालची दिन बिते नग्नो तिमीले छुँदा ॥

बोली अक्कडता मिठासपन खै संस्कार बेग्लै थियो ।
जाग्दै बस्छ सदैव कौतुहलता निभ्दै गरेको दियो ॥
काँडा फुल्दछ बागमा कुसुम झैँ मीठो छरी बासना ।
प्यारा शासकको बिचार धमिलो देखिन्छ नग्नोपना ॥

आफ्नो कर्म, विचार, भाव अथवा आचार चिन्नेहरू ।
अर्काको घरवारमा नजरले गाडेर छिन्नेहरू ॥
ब्वाँसा स्याल बनी चुसे रगत यो मान्छे बिगारी तर ।
पोका बोक्छु म कष्टका हृदयमा फर्केर आए घर ॥

०००
पाटन २ सिलङ्गा,बैतडी
हालः-पहलमानपुर,कैलाली