नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

चर्ने मौकाहरू आए खेर फाल्न म जान्दिनँ
कुर्सी चढ्न सिकेँ मैले सिकेको छैन ओर्लिन ।२१ ।

खेती गर्न नजानेर राजनीति समाइयो
आज खेती गरौँ भन्दै सोझासिधा भुल्याइयो ।२२ ।

फस्टायो झुटको खेती असाध्य फलिफाप भो
अस्तायो सत्यको घाम खाँडो जाग्दैछ पापको ।२३ ।

कोखाकोखा भनी आफै हाम्म गरेर पन्पिने
रमाइलो यही बाटो लाग्यो भविष्य चम्किने ।२४ ।

गणतन्त्र बनाएको देश पार्न गनाउँने
बन्दैछु पहिलो मान्छे गन्धभित्र रमाउने ।२५ ।

यही बाटो सबैभन्दा राम्रो जस्तो अचेल देख्दछु
सत्य बाटो हिँडे जोजो काँडा छरेर छेक्दछु ।२६ ।

अलपत्र बनाएर भेउ केही नपाउने
गणतन्त्रे कुरा गर्छु देशबासी भुल्याउने ।२७ ।

दायाँबायाँ नजानेका मान्छे मार्दछु भोकले
लोकतन्त्र भनेको नै काल हो सम्झ लोकले ।२८।

अरूका पसिना चुस्ने नीति हुनेछ देशको
सक्नेले फाइदा लिन्छन् बिग्रँदो परिवेशको ।२९।

जोजो छन् पाखुरा चाल्ने तिनै मारिनु पर्दछ
माखेसाङ्लाहरू बुन्ने मोटा पारिनु पर्दछ ।३०।

क्रमशः

०००
ओखलढुङ्गा, हाल भक्तपुर