मोबाइल महिमा
चिन्ता कसैमा यसैले थप्यो कसैको चिन्ता यसैले लग्यो न राख्नु न फ्याक्नु मलाई बनायो यो मोबाइल कसले बनायो ?
भोलानाथ सुवेदी :
गोजीमा लुकेर बसेको साथी
पैसा पाएमात्र बोल्ने जाती
कसले बनायो यस्तो यन्त्र
सबै मस्त सबै अभ्यस्त
कानमा पुगी हातमा झर्ने
साथ हिँड्न औधी गर्ने
बेलाबेला यसले खान खोज्छ
धेरैबेर चलाए अनेक गर्छ
सुरुवाल यसैले तलतल सार्छ
कहिले त यसले लाजमर्दो पार्छ
अनेक कम्पनीको अनेक जात
भेटेपछि कहिले छोड्दै हात
हजार भन्दा तलको नि पाइने
लाखभन्दा माथिको नि चाहिने
टिकटक बनाएर फिट हुने
रुवाउँदै हसाउँदै हिट हुने
आँखाको ज्योति लान्छु भन्छ
कुलतको लतमा पार्छु भन्छ
मान्छेले छाक कति छोड्छन्
यौटा मोबाइल अवस्य जोड्छन्
अनुहार हेरी गफ गर्न मिल्ने
अनेक अनेक बाहाना फुर्ने
तरकारी र भात कतिका डढे
दुर्घटनामा परि कति जना मरे
चिन्ता कसैमा यसैले थप्यो
कसैको चिन्ता यसैले लग्यो
न राख्नु न फ्याक्नु मलाई बनायो
यो मोबाइल कसले बनायो ?
०००
(९८४३०५४१६१)