नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

धरोधर्म धरोधर्म गर्छु अनेक गर्दछु
सबैले गफ पत्याए नेता पक्का ठहर्दछु (४१)

धर्म गर्नेहरूलाई पाप गर्न लगाउँछु
अधर्मी साथ लाएर धर्मको गीत गाउँछु (४२)

कुर्सीको भोक लाग्दा म धर्म भन्दै कराउँला
पाएमा पदको स्वाद उल्टो कर्म गराउँला (४३)

रित्तो देखेँ भनेदेखि भनौँला भर्न आउँछु
भकारी भरिलो देखे खुसुक्क चर्न आउँछु (४४)

भोट माग्दा दशै औंला सोझा पारेर आउँछु
जित्नासाथ यिनै औँला बङ्ग्याएर अघाउँछु (४५)

चुनावमा दुखी देख्छु चित्त दुखेर आउँछ
तिनकै मत पाएमा पीडा मेरो हराउँछ (४६)

चर्चा चुनावको चल्दा आँखा मेरो रसाउँछ
तुरुन्तै ओठले मेरा योजना बक्बकाउँछ (४७)

सबैका घरमा पुग्छु आँसु तप्प खसाउँछु
ओठ, जिब्रो र आँखाले सोझासिधा फसाउँछ (४८)

विनम्र बनियो जिब्रो अमूल्य भोट पाउन
मिलाएर जुट्यो ओठ सोझाको गीत गाउन (४९)

राम्रा गीत सुनाएर सोझा पारिन्छ जालमा
इच्छा पूर्ण हुनासाथ बस्न पुग्नुछ खालमा (५०)

क्रमशः

०००
चाँगुनारायण, भक्तपुर