नेपाली हास्यव्यङ्ग्य अनलाइन पत्रिका

एमपी पाण्डे :

गोठ गर्भिणी भयो
खशीले बलत्कार गरेपछि
आजीवन काराबासको सजाय तोकियो
निर्दोष भेडालाई दोषी करार गरेर
अनि, मैले देश छोडेँ
गधाहरूको गाँस काटिएपछि
मालिक अघायो
बाँचुन्जेल शान्ति….
मर्दा मलामी पाएनन् मेरा बाले
गाउँ निकाला गरियो आमालाई
पोइ-टोकुवाको आरोपमा
सिमापारि पुग्यो, सधिँयार बिनाको साँध
भोलि पर्सि के जवाफ दिनु खोइ ?
हाम्रो छोराले देश खोज्यो भने
एक थान नेपालको नक्सा
सुरक्षित राख्नु है बुढीमाउ
भरे त्यै पनि नपाउन बेर छैन
खेतालाले शासन चलाएको देशमा
आखिर बिषै छाद्ने न हो
सर्पलाई दूध पिलाए पनि
अब सपेरा रोप्ने दिन आए
सुहागरातको पहिलो प्रहरमा
गर्भ निरोधका अवरोधहरू छलेर
ता कि
गर्भैदेखि माटो, मुटु
र
राष्ट्रियताको बिन बजाओस्
भावी पुस्ताले
मेचीकालीको लयमा लय मिसाउँदै
गुनगुनाओस् स्वाधिनताको गीत !
स्वाधिनताको गीत !!

०००
मिर्गस्थली, काठमाडाैं
२२-१०-०८०