नेपाली हास्यव्यङ्ग्य अनलाइन पत्रिका

गायत्री परिरोशनी :

हामी सुगमका सुकुमबासीहरूलाई
पेट गिलो हुँदा दुख्छ
टाउको साह्रो हुँदा दुख्छ ।
हिँड्दा एउटा खुट्टा अघि हुँदा दुख्छ
अर्को खुट्टा पछि हुँदा दुख्छ ॥
पुरुषलाई सुत्केरी व्यथा लागेर दुख्छ
चोर कमिलाले टोक्दा दुख्छ ।
ज्यानमारालाई जेलमा ठोक्दा दुख्छ ।
आफ्नो कुकुरले गिलो हग्दा दुख्छ
आफ्नो कुकुरले साह्रो हगे पनि दुख्छ ॥

तर,
दुर्गममा सडक दुर्घटना हुँदा दुख्दैन
झाडापखलाले मान्छे मर्दा दुख्दैन ।
पहिरोले पुरै गाउँ पुर्दा दुख्दैन ।
भूकम्पले सबै घर भत्काउँदा दुख्दैन
सुत्केरी व्यथाले आमा र बच्चा मर्दा दुख्दैन ॥
भोकमरी र अनिकाल पर्दा दुख्दैन
विभिन्न कारणले मान्छे अकालमा मर्दा दुख्दैन ।
अँ— हँ जुनसुकै वाद र जुनसुकै तन्त्रका
जे—जे आए पनि
दुर्गममा सधैँभरी विकास मरिरहन्छ
सुगमका हुकुमबासीको कहिल्यै केही दुख्दैन ॥

०००
स्याङ्जा