नेपाली हास्यव्यङ्ग्य अनलाइन पत्रिका

किशन पौडेल :

प्रवृत्ति उस्तै छ
संस्कार उस्तै छ
कुण्ठा उस्तै छ
मानसिकता सधैँ उस्तै छ ।

न दूर दृष्टि छ
न दूरदर्शी छ
न कुनै दर्शन छ
न कुनै आदर्श छ
यो कठपुतली
सरकार सधैँ उस्तै छ ।

लोभ लालच उस्तै छ
स्वार्थ लिप्सा उस्तै छ
दुराचार झनै बढ्दै छ ।
अराजक र भ्रष्टाचार सधैँ उस्तै छ ।

न अलिकति इमान छ
न अलिकति नैतिकता छ
न कसैको डर छ
यो जाल, झेल ,षड्यन्त्र
बहुरङ्गी गठबन्धनको
जोड घटाउ सधैँ उस्तै छ ।

स्वाँठ तिनै हुन्
धूर्त तिनै हुन्
कुटिल तिनै हुन्
लोभी पापीहरू पनि तिनै हुन्

मात्र फेरिन्छ पात्र
चरित्र तिनै हुन्
हामी फगत तमासे हौँ
रमिता सधैँ उस्तै छ !!

०००
हेटौंडा