नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

आफ्नो काम गरौँ आफै मेरो भनाइ हैन र
केही गरेन नेताले भन्नै हुँदैन हुन्छ र । (७१)

आफ्नो गाडी चढौँ आफै राम्रो सिद्धान्त छैन र
आफ्नो पेट भरौँ आफै उच्च विचार हैन र । (७२)

आफ्नो बिहे गरौँ आफै थालौँ जोडी मिलाउन
नबसौँ घरमा बास डुल्न जङ्गल जाउन । (७३)

अर्को मर्दा सधैं हामी मलामी किन धाउनु
आफै मुर्दा भएकोमा आफैं शङ्ख बजाउनु । (७४)

आफ्नो लाश चितामाथी म आफैले चढाउँछु
मेरो यो जिउँदो लाश खरानी मै बनाउँछु ।(७५)

म काजकिरिया आफ्नो आफैले नै गराउँछु
त्यसैले गाउँमा हुन्न अन्त कतै कराउँछु । (७६).

आफ्नो श्राद्व गरी आफैं गर्छु पिण्ड र तर्पण
आफ्नो कर्म सकी फेरि आफैलाई समर्पण । (७७)

यसैगरी सबै आफ्नो काम आफै गरेपछि
नमरी स्वर्गमा पुग्न आफ्नो थैलो भरेपछि । (७८)

मलाई नै धरोधर्म जोसुकैले जिताउँछन्
बिरोधि जिउँदो देख्छन् अनि पाप चिताउँछ्न् । (७९)

मरेको जिउँदो आफै थाहापत्ता नपाउने
सच्चा मान्छे उठेको छु काम गर्नु जिताउने ।(८०)
क्रमश :

०००
चाँगुनारायण, भक्तपुर